Qulsaryda tasqyn sý basqan 867 úıge tehnıkalyq tekserý júrgizildi
Atyraý oblystyq jedel shtabtyń málimetine súıensek, turǵyndardan tasqyn sýdan búlingen múlkin baǵalaý úshin 2 myń 733 ótinish túsken.
«Qazir Qulsary qalasynda tasqyn sý basqan nysandarǵa tehnıkalyq tekserý jáne baǵalaý úshin 40-tan astam arnaıy maman tartyldy. Olar bul jumystardy demalyssyz júrgizýdi qolǵa aldy. Máselen, 26 sáýirden 3 mamyrǵa deıin 867 nysanǵa tehnıkalyq tekserý júrgizildi. Bul jumysty 15 mamyrǵa deıin aıaqtaý kózdelip otyr», - dep habarlady oblystyq jedel shtab.
Sondaı-aq, tasqyn sý kezinde ólgen tórt túliktiń qunyn tóleý úshin ótinish qabyldaý júrip jatyr. Búginge deıin turǵyndar 87 ótinish bergen.
Al, dezınfektsııalaý jumysyna 8 brıgada tartylǵan. Osy kezge deıin 26 áleýmettik nysan, 45 kóshede ornalasqan 1 myń 347 úıge dezınfektsııalaý júrgizilgen.
«Jylyoı aýdanyndaǵy Qulsary qalasynda qalpyna keltirý jumystary bastalǵaly beri 3,5 mln tekshe metr sý soryldy. Bul jumysty atqarýǵa 2700-ge jýyq adam men 125 sý soratyn tehnıka jumyldyryldy. Búgin, 3 mamyrdaǵy málimetke sáıkes 2 myń 704 nysan sýdan tolyǵymen qurǵatyldy», -dep málim etti oblystyq jedel shtabtan.
Eske sala ketelik, budan buryn Qulsary qalasynda sý tasqynynyń zardabyn joıý jumystary qalaı júrip jatqanyn habarlaǵan edik.