Almatyda 6 baldan joǵary jer silkinisiniń qaýpin baǵalaıtyn arnaıy aqparattyq júıe ázirlenedi

<p>ALMATY. KAZINFORM &ndash; Almaty qalasynyń Seısmıkalyq qaýipsizdik jáne jumyldyrý daıyndyǵy basqarmasy men Tótenshe jaǵdaılar jáne tabıǵı apattar qaýpin azaıtý ortalyǵy birqatar baǵyt boıynsha yntymaqtastyqty kúsheıtedi. Taraptar Almatynyń damý ortalyǵymen birlesip tıisti memorandýmǵa qol qoıdy.</p>

Basqarma basshysy Batyrhan Súleımenov qalada ǵımarattarǵa seısmıkalyq aýdıt júrgizý men tótenshe jaǵdaı kezinde halyqtyń is áreket mádenıetin arttyrý boıynsha jumystyń belsendi júrgizilip jatqanyn atap ótti. Aıtýynsha, seısmoaýdıt aıaqtalǵannan keıin 6 baldan jáne odan joǵary jer silkinisteriniń yqtımal nátıjesin modeldeýdiń arnaıy aqparattyq júıesi ázirlenedi.

«Memorandým Ortalyq Azııa elderiniń qoldanystaǵy ulttyq júıesin biriktirý jolymen jer silkinisiniń týyndaý qaýpi týraly erte habarlaýdyń jáne ózara habarlaýdyń óńirlik júıesin kúsheıtý jónindegi qyzmetti shoǵyrlandyrýǵa baǵyttalǵan. Sondaı-aq, biz túrli apattyń qaýip faktoryn baǵalaý boıynsha halyqaralyq ádistemelerdi birlesip engizemiz», - dedi Batyrhan Súleımenov.

Óz kezeginde tótenshe jaǵdaılar jáne tabıǵı apattar qaýpin azaıtý ortalyǵynyń dırektory Serik Áýbákirov bul kelisim barlyq múddeli taraptyń kúsh-jigerin shoǵyrlandyrýǵa jáne tótenshe jaǵdaıdyń aldyn alý salasyna ınvestıtsııa tartýǵa yqpal etetinin jetkizdi.

Aıta keteıik, Ortalyq QR Syrtqy ister mınıstrliginde memleketaralyq organ – halyqaralyq uıym retinde taǵaıyndalǵan.

Negizgi qyzmet – apattar qaýpin azaıtý, tótenshe jaǵdaıdyń aldyn alý jáne joıý, sondaı-aq klımattyń ózgerýine beıimdelý salasyndaǵy óńirlik jáne halyqaralyq yntymaqtastyqty nyǵaıtý. Buǵan deıin megapolıste jer silkinisin eskertetin júıe synaqtan ótip, almatylyqtar prezıdenttik habarlama alǵan bolatyn. 

Almaty ákimdigi atap ótkendeı, Mass Alert júıesiniń SMS-ke qaraǵanda birqatar artyqshylyǵy bar. Habarlama mobıldi operator jelisine qosylǵan, sondaı-aq jeke tańdalǵan geografııalyq aımaqtaǵy barlyq abonentke keledi. Sonymen qatar júıe jelilerdiń shamadan tys júktelý jaǵdaıynda jumys isteıdi.

Cell Broadcast tehnologııasynyń basty artyqshylyǵy — qamtý aımaǵyndaǵy barlyq abonentti birden ári jappaı eskertedi.