Almatyda 57 jyl paıdalanylǵan jylý qubyry aýystyryldy
Almatyda Súıinbaı dańǵyly boıyndaǵy Garshın kóshesinen Bekmahanov kóshesine deıingi aralyqtaǵy qubyrdy aýystyrý jumystary aıaqtaldy. Qaıta jóndelgen bóliktiń uzyndyǵy 644,5 metr.
Aýystyrylǵan qubyr 1967 jyly paıdalanýǵa berilgen jáne qazirgi ýaqytta 3 kópqabatty turǵyn úı men 1 jeke úıdi jylý jáne ystyq sýmen qamtamasyz etedi.
«Qalada bıyl 20 km jylý jelilerin qaıta jańartý kózdelgen. Almatynyń 6 aýdanynda jylytý aralyq kezeńge josparlanǵan qaıta qurý jumystary bekitilgen kestege sáıkes júrgiziledi. Aýmaqtardy abattandyrý aýa raıyna qaraı kezeń-kezeńimen júzege asady»,- dep atap ótti ákimdikten.
Osyǵan deıin Abaı dańǵyly men Saın kóshesiniń batys baǵytynda 2 shaqyrymǵa jýyq qubyrdyń jańartylǵany týraly jazǵan edik.
Esterińizge sala keteıik, qozǵalysty shekteýge qatysty barlyq aqparat Almaty.kz saıtynda, @AlmatyJoly Telegram arnasynda, aýdandyq ákimdikter men basqarmalardyń áleýmettik jelisinde, sondaı-aq 2GIS pen «ıAndeks kartalar» servısinde jarııalanǵan.