Almatyda 500-den asa arnaıy tehnıka joldy qar men muzdan tazalaýda

<p>ALMATY. KAZINFORM - Almatyda qar aralas jańbyr jaýyp, kommýnaldyq qyzmet kúsheıtilgen rejımde jumys jasap jatyr.</p>

Tańǵy saǵat 9-daǵy málimet boıynsha qalada 4 mm jaýyn-shashyn, al Shymbulaqta 0,5 sm qar túsken. Kúndizgi ýaqytta 565 birlik arnaıy tehnıka men 1069 jumysshy jumyldyryldy. Aryq ótkelderiniń bitelýiniń aldyn alý jáne jergilikti sý basý máselesin joıý úshin motopompa, bagr jáne basqa quraldarmen jabdyqtalǵan 32 jedel mobıldi brıgada kezekshilik etedi.

Kóktaıǵaqtyń aldyn alý maqsatynda Bostandyq jáne Medeý aýdandarynyń joǵarǵy bóliginde 120 qumshashqyshtyń kómegimen kóktaıǵaqqa qarsy materıaldar sebildi.

Tańerteńgi saǵat 9-ǵa deıin 55 tonna materıal paıdalanyldy. Tańǵy saǵat 5-ten bastap 30 «Epoka» tehnıkasy arqyly qalanyń joǵarǵy aýdandaryndaǵy joldar (Medeý, Shymbulaq, Býtakovka, ShAAJ, Sadyqov, Asqarov, Dýlatı kósheleri jáne t.b.) suıyq kóktaıǵaqqa qarsy reagenttermen óńdeldi. Barlyǵy 85 m³ muzǵa qarsy eritindi qoldanylǵan.

«Qazgıdromet» RMK málimetinshe, kúndiz aýa temperatýrasy +2…+4 °C bolady.

Eske salaıyq, buǵan deıin aýa raıyna baılanysty jabylǵan birneshe óńirdegi jol qaıta ashylǵanyn jazǵanbyz.