Almatyda 459 bilim berý uıymynda keshendi qaýipsizdik júıesi engizildi
Almaty qalasy ákimdiginiń baspasóz qyzmeti atap ótkendeı, shahar basshysy Erbolat Dosaevtyń tapsyrmasy boıynsha memlekettik orta jáne mektepke deıingi bilim berý uıymdarynda «Keshendi qaýipsizdik júıesi» jobasy iske asyrylyp jatyr. Qaýipsizdikti qamtamasyz etý boıynsha júz paıyz jumys júrgizildi.
Keshendi qaýipsizdik júıesi táýlik boıy kúzetti qamtamasyz etedi ári ǵımarattyń ishinde ornalasqan. Qaýipsizdik júıesi polıtsııa departamentine dabyl arqyly statsıonarlyq jedel áreket etetin dabyl túımesimen tolyqtyryldy. Qandaı da bir oqıǵa nemese tótenshe jaǵdaı týyndaǵan jaǵdaıda jedel top keledi.
«Ornatylǵan vıdeokameralardan dabyl tikeleı polıtsııa departamentiniń jedel ortalyǵyna túsedi. Bilim berý obektileriniń búkil aýmaǵy táýlik boıy perımetri boıynsha qaralady. Beınebaqylaý kameralaryndaǵy materıaldar 30 táýlikke saqtalady. Sondaı-aq arnaıy kabınetterde jáne kitaphanada kúzet dabyly qarastyrylǵan, bul júıe eseptelgen jáne órt qaýipsizdigi júıesimen baılanysty, kúzet dabyly iske qosylady (qatty shý, esikter nemese terezeler ashylǵan kezde, qozǵalys kezinde nemese áınek synǵan kezde)»,- dep habarlady ákimdikten.
Qazir Almaty qalasynda barlyq 459 vedomstvolyq baǵynysty memlekettik bilim berý uıymdarynda mamandandyrylǵan kúzet jáne beınebaqylaý júıesi jumys isteıdi.
«Qalada 186 balabaqshaǵa jabdyqtar ornatý jumystary júrgizildi. Atap aıtqanda, 8638 beınebaqylaý júıesi ornatyldy, onyń ishinde 7062 - ishki, 1576 – syrtqy. Sondaı-aq, barlyq balabaqsha Almaty qalasy polıtsııa departamentiniń jedel basqarý ortalyǵyna (JBO) dabyl berý múmkindigi bar órtke qarsy qaýipsizdik júıesimen jabdyqtalǵan. Memlekettik menshik nysanyndaǵy mektepke deıingi bilim berý uıymdaryn baqylaý júıelerimen (domofondarmen), beınebaqylaý kameralarymen, dabyl túımelerimen jáne órtke qarsy qaýipsizdiktiń keshendi júıelerimen jaraqtandyrý jumystary oryndaldy»,- delingen habarlamada.
2023 jyldyń jeltoqsan aıynyń basynan bastap beınebaqylaý kameralary, jedel basqarý ortalyǵyna qosylǵan mektepterdiń dabyl túımelerin jańartý jumystary bastaldy. Qazir 205 mektep pen 10 ınternat qaýipsizdik júıesimen qamtamasyz etilgen. Nátıjesinde 215 uıymda 11 831 beınebaqylaý kamerasy, 215 dabyl túımesi, betti taný múmkindigi bar 416 týrnıket ornatyldy.
Qaýipsizdik júıelerimen qalanyń kolledjderi de jabdyqtalǵan. Máselen, 20 kolledjde 1503 beınebaqylaý júıesi ornatyldy. Onyń 126 kamerasy JBO-ǵa qosylǵan. Sondaı-aq, dabyl túımeleri men týrnıketter ornatylǵan jáne barlyq 20 kolledjge mamandandyrylǵan kúzet qyzmet kórsetedi.