Almatyda 4 jańa sý qoımasy salynyp jatyr

<p>Almaty qalasynda jańa sý qoımasy jobalanyp, qurylysy bastaldy. Bul týraly qala ákimi Erbolat Dosaev aıtyp berdi, dep habarlaıdy <a href="Kazinform." target="_blank" rel="noopener">Kazinform.</a></p>

«Qazir 4 jańa sý qoımasynyń jobasy jasalyp, qurylysy bastaldy. 27 jeltoqsanda Naýryzbaı aýdanynyń shyǵys bóligindegi Qarǵaly ózeni boıyndaǵy sý qoımasy tehnıkalyq túrde iske qosylady. Aqsaı sý qoımasy josparlanǵan merzimge sáıkes salynyp jatyr. Ermensaı jáne Barlyq ózenderindegi sý qoımalary jobalaý satysynda tur», - dedi E. Dosaev Ortalyq kommýnıkatsııalar qyzmetinde ótken baspasóz brıfınginde. 

Sonymen birge ákim bıylǵy jazda aptap ystyqtan Medeý aýdanynyń joǵarǵy bóliginde sý tapshylyǵy sezilgenin atap ótti. 

«Tapshylyqty joıý úshin qýaty táýligine 32 myń m3 bolatyn sýmen jabdyqtaýdyń rezervtik shemasy qurylýda, ol 2024 jyldyń maýsym aıynda aıaqtalady. Sýdyń negizgi kózderi Talǵar jerasty sýlary jáne sorǵy stantsııalarynyń qýatyn 60%-ǵa arttyryp, 6 jańa uńǵymany burǵylaý bolmaq. Bıyl jyl sońyna deıin «Kamenskoe plato» aýdanynyń turǵyndaryn sýmen jabdyqtaý boıynsha kóp jyldyq problema sheshiledi», - dedi E. Dosaev.

Aıta keteıik, Erbolat Dosaev elordada Almaty qalasynyń áleýmettik-ekonomıkalyq damýy týraly esep berip jatyr. Buǵan deıin qala ákimi Almatyda dızelmen júretin avtobýs satyp alýǵa tyıym salynýy múmkin ekenin aıtqan edi.