Almatyda 36,8 myń oryndyq 22 jaıly mekteptiń qurylysy júrip jatyr

<p>ASTANA. KAZINFORM - Oqý-aǵartý mınıstri Ǵanı Beısembaev Almaty qalasynyń bilim berý uıymdarynyń jańa oqý jylyna daıyndyǵyn tekserdi, dep habarlaıdy mınıstrliktiń baspasóz qyzmeti.</p>

«Sanaýly kúnderden keıin 4 mln-ǵa jýyq oqýshy úshin mektep esikteri aıqara ashylmaq. Barlyq pedagogter jańa oqý jylynyń qarsańynda synyptardy jasaqtaý, sabaq kestelerin qurý, oqýlyqtar taratý sekildi daıyndyq jumystaryn júrgizýde. Osy aptada birqatar óńir men Almaty, Astana qalalarynyń bilim berý uıymdarynyń daıyndyqtarymen, onyń ishinde qurylys, jóndeý jumystarymen, qaýipsizdik júıeleriniń jabdyqtalýymen, tamaqtanýdyń uıymdastyrylýymen tanystym. Eń bastysy, mektep ujymdarymen kezdesip, jańa oqý jylyndaǵy mindetterdi birge talqyladym»,-dep jazdy óziniń Facebook paraqshasynda QR Oqý-aǵartý mınıstri Ǵanı Beısembaev.

Onyń jazýynsha, ótken jyly oqý-aǵartý mınıstrligi Almaty qalasynyń ákimdigimen bilim berý júıesin damytýdyń birlesken Jol kartasyn qabyldaǵan, onyń negizinde birqatar másele sheshimin taýyp jatyr, ásirese, úsh aýysymdy mektepterdi joıý boıynsha jumystar júıeli júrgizilýde.

Bıylǵy jyly Almatyda 36,8 myń oqýshyǵa arnalǵan 22 jaıly mekteptiń qurylysy júrip jatyr. Onyń ishinde birinshi bolyp Áýezov aýdanynda №97 mektep paıdalanýǵa berildi. Atalǵan mektep barlyq zamanaýı talaptarǵa saı keledi, munda erekshe bilim berýdi qajet etetin balalar úshin ınklıýzıvti kedergisiz orta, balalardyń shyǵarmashylyǵyn, kitap oqý daǵdysyn damytýǵa, tsıfrlyq tehnologııalardy ıgerýge arnalǵan aımaqtar, bastaýysh pen joǵary synyptar úshin jekelegen bloktar qarastyrylǵan.

Qalanyń 13 mektebi kúrdeli jóndeýden ótýde, mektepterdiń basym bóliginde jumystar tolyq aıaqtalǵan. Mysaly, Bostandyq aýdanyndaǵy №70 mekteptiń 1,2 myń oqýshysy bıylǵy oqý jylynda jańartylǵan mektepte bilim alady.

Jalpy, bilim basqarmasynyń málimetinshe, búginde almatylyq mektepterdiń 86,5%-nyń pándik kabınetteri jańartylyp, jaratylystaný-matematıka tsıkli pánderi boıynsha bilim alýǵa jaǵdaı jasalǵan.

«Bıylǵy oqý jylynda bilim sapasyn arttyrýǵa jáne oqý protsesinde jaıly orta qalyptastyrýǵa, ásirese, mekteptiń ishki erejesi men jarǵysynyń saqtalýyna, balalardyń qaýipsizdigine, tamaqtanýdyń uıymdastyrylýyna basymdyq berilmek»,-dedi mınıstr.

Almatyda byltyr 5 myńǵa jýyq bala ınklıýzıvti bilimmen qamtylǵan.