Almatyda 36 túp tıan-shan shyrshasy otyrǵyzyldy
Sátbaev kóshesinde 22 shirigen aǵashtyń ornyna bıiktigi 6 metrden asatyn 36 túp tıan-shan shyrshasy otyrǵyzyldy. Jergilikti tálimbaqtyń kóshetteri qalanyń klımattyq jaǵdaıyna sáıkes keledi, tózimdiligi joǵary jáne agressıvti qalalyq ortaǵa tez beıimdele alady.
– Eski aǵashtardy aýystyrý qajetti shara boldy. Eske salsaq, kóshpeli keńes barysynda ǵylymı qyzmetkerlerdiń, sarapshylardyń, qoǵam qaıratkerleriniń jáne BAQ ókilderiniń qatysýymen Sátbaev kóshesindegi aǵashtardyń jaǵdaıy baǵalandy. Ýchaskede eski shyrshalar ósedi, olar zertteý nátıjeleri boıynsha apatty dep tanylyp, qala turǵyndary men qorshaǵan ortaǵa qaýipti ekeni anyqtalǵan bolatyn,– dep habarlady Almaty ákimdiginen.
Bıiktigi 4-ten 6 metrge deıingi iri kóshetterdi paıdalaný aǵashtardyń tirshiligin jaqsartýǵa, jetilgen landshaft jasaýǵa jáne qala kósheleri men saıabaqtarynyń estetıkalyq kelbetin saqtaýǵa múmkindik beredi.
– Ǵalymdardyń usynystary boıynsha qysta qylqan japyraqty aǵashtardy otyrǵyzý topyraqtyń jabyq kesegimen júrgizildi,– delingen habarlamada.
Buǵan deıin Sátbaev kóshesiniń boıyndaǵy qýraǵan qylqan japyraqtylardy kesip, ornyna jańasyn otyrǵyzylatyny týraly jazǵan edik.
Budan bólek, shahar basshysy 2025 jyly qalaǵa bıiktigi 6 metrden asatyn 27 myń iri kóshet otyrǵyzylatyny týraly aıtqan bolatyn.