Almatyda 304 uıymdaǵy memlekettik rámizder tekserildi

<p>ALMATY. KAZINFORM - Áleýmettik qyzmetter úıinde QR Memlekettik rámizder kúnin merekeleý sheńberinde qoǵam qaıratkerleriniń, tarıhshylardyń, sarapshylardyń, úkimettik emes uıymdar ókilderiniń jáne jastardyń qatysýymen &laquo;Kók týdyń jelbiregeni&raquo; taqyrybynda
konferentsııa ótti.</p>

Konferentsııa Almaty qalasy Qoǵamdyq damý basqarmasynyń qoldaýymen óskeleń urpaqtyń boıynda patrıottyq sezimdi tárbıeleý, memlekettik rámizderdi nasıhattaý, azamattardyń óz eliniń salt-dástúrlerine, tarıhy men mádenıetine degen qyzyǵýshylyǵy men qurmetin saqtaý maqsatynda uıymdastyryldy.

- Memlekettik rámizderge qurmetpen qaraý óte mańyzdy. Jyl basynan beri qalamyzda ornalasqan memlekettik rámizderge monıtorıng jumystaryn júrgizdik. Memlekettik týdyń ǵımarattarda ornalasýy, onyń durys turǵany, kirlegeni nemese basqasha búlinýi tekserildi. Oǵan 304 uıym qamtyldy. Barlyǵynda derlik talaptar saqtalǵan, biraq kemshilikteri bar mekemeler de anyqtaldy. Ol mekemelerdiń basshylarmen sóılesip, eskertý jasaldy. Bul jumys qalamyzda júıeli túrde ótedi, - dedi Almaty qalasy Qoǵamdyq damý basqarma basshysy Aıdar Esenbekov.

«Generaldar keńesi» respýblıkalyq qoǵamdyq birlestiginiń tóraǵasy, general-leıtenant Beksultan Sársekuly megapolıste turatyn 50-den astam generaldyń jastar arasynda tárbıelik jumys júrgizip jatqanyn atap ótti.

Foto: Kazinform/Dosbol Atajan

 

- Men BUU júıesinde jumys isteı júrip, kóptegen memleketterde boldym. Sonda úlken zalǵa kirip, óz elińniń týyn kórgende birden qasyna baryp sýretke túskiń keledi. Bizdiń memlekettik baıraǵymyz óte ádemi, muny kóbisi aıtady. Al ánuran aıtylǵanda eriksiz ony oryndaýǵa qosylyp ketesiń. Eltańbany kórgende boıyńdy maqtanysh bıleıdi. Biz jastardy patrıottyqqa tárbıeleýge baılanysty josparymyzdy qala basshylyǵyna kórsettik. Almatyda 50-den astam úlken qyzmetter bolǵan generaldar turady. Olardyń bilimi, olardyń tájirıbesi qazir jastarǵa berilýi kerek, - dedi general-leıtenant Beksultan Sársekuly.