Almatyda 3 myńnan astam bala qyzylsha juqtyrǵan

<p>Almaty qalasynda qyzylsha aýrýy boıynsha epıdemıologııalyq jaǵdaı turaqsyz. Naýryz aıynan beri shaharda qyzylshamen aýyrǵandar boıynsha zerthanalyq rastalǵan 4100 jaǵdaı tirkeldi. Olardyń basym bóligi 14 jasqa deıingi balalar, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Almaty qalasynyń Sanıtarııalyq-epıdemıologııalyq baqylaý departamentiniń basshysy Qasymhan Alpysbaıulynyń aıtýynsha, balalar arasyndaǵy aýrýshańdyq negizinen vaktsınatsııadan bas tartý sebebinen bolyp otyr.

«2023 jyldyń naýryz aıynan bastap qyzylshanyń 4100 zerthanalyq rastalǵan jaǵdaıy tirkeldi. Onyń ishinde 14 jasqa deıingi balalar arasynda 3128 jaǵdaı (76,3%), 15 jastan 18 jasqa deıingi jasóspirimder arasynda – 162 (3,9%) jáne eresekter arasynda – 810 (19,7%). 3128 balanyń 2990-y qyzylshaǵa qarsy egilmegen (95,5%), onyń ishinde vaktsınatsııadan bas tartý sebebinen – 2096 (70,1%), medıtsınalyq qarsy kórsetilimder – 411 (13,7%) jáne 476 (15,9%) jaǵdaıda egý jasyna jetpegen», - deıdi departament basshysy.

2023 jyldyń 10 qarashasy men osy jyldyń 3 qańtar aralyǵynda qalada qyzylshaǵa qarsy qosymsha jappaı ımmýndaý sheńberinde barlyǵy 80 343 adam qamtyldy.

«Onyń ishinde 6 aıdan bastap 10 aı 29 kúnge deıingi 6952 bala, 2 jastan 4 jasqa deıingi balalar – 27 950, medıtsına qyzmetkerleri – 8676 jáne basqa jastaǵy buryn qyzylshaǵa qarsy josparly ekpe almaǵan (vaktsınatsııa kýrsy tolyq emes) 36 765 bala bar. Qazirgi ýaqytta qalada vaktsına jetkilikti mólsherde bar. Qyzylshaǵa qarsy vaktsınanyń árbir alynǵan dozasy balanyń ımmýnıtetin kúsheıtedi», - dedi Qasymhan Alpysbaıuly.