Almatyda 2800 adam qabyldaý pýnkterine júgingen

<p>ALMATY. KAZINFORM &ndash; Qatty jer silkinisinen keıin Almatynyń 2800-ge jýyq turǵyny qabyldaý pýnktterine júgingen. Mundaı oryndarǵa mektepter men balabaqshalar jatady. Olardyń barlyǵy seısmıkalyq jaǵynan turaqty. Kazinform fototilshisi atalaǵan pýnkterdiń birine bardy.</p>

Qalalyq Tótenshe jaǵdaılar departamentiniń basshysy Nurlan Atyǵaev baspasóz máslıhaty barysynda qabyldaý oryndaryna 2800-ge jýyq adam kelgenin, onyń 906-sy bala ekenin aıtty.

«Bul turǵyndardyń ýaqytsha jınalatyn oryndary. Olar adamdardyń sýyq aýa raıynda dalada qalmaýyn jáne naqty jaǵdaıǵa baılanysty arnaıy nusqaý kelgenshe sol jerde qalýyn qamtamasyz etý úshin jasalǵan»-, dedi Nurlan Atyǵaev.

Foto: Kazinform

Almaty ákimdiginiń aqparatyna sáıkes, qalada 384 qabyldaý pýnkti ashyldy: 229 mektep jáne 115 balabaqsha, 15 JOO, 20 kolledj jáne 5 stadıon. 

Bizdiń agenttiktiń fototilshisi No18 mektep-gımnazııasynda bolyp, mektep dırektorymen áńgimelesti.

«Búgin 11:22-de jer silkindi. Bul sabaq ýaqytynda boldy. Mektep buıryqqa sáıkes áreket etti. Buǵan deıin biz jattyǵý jumystaryn júrgizgen edik. Sondyqtan oqýshylar men muǵalimder daıyn boldy. Jer silkinisi bolǵan kezde barlyǵy partanyń astyna tyǵylyp, syrtqa shyqty. Qazir bizde zardap shekken turǵyndardy qabyldaý ortalyǵy bar, ol birden ashyldy. Saǵat 12:00-den keıin mektep mańynda turatyndar bizge kele bastady. Qazirdiń ózinde 44 adam qabyldandy, onyń 25-i bala. Turǵyndardyń esebin júrgizemiz, munda kezekshi medbıke bar, turmysqa qajetti zattar da jetkilikti», – deıdi No18 gımnazııa dırektory Gúljamılá Naýryzbaeva.