Almatyda 201 myńnan astam adam tumaýǵa qarsy egildi

<p>ALMATY. KAZINFORM — Almatyda epıdemıologııalyq naýqan bastalǵaly beri 12 413 adam jedel respıratorly juqpaly vırýsyn juqtyrǵan. Onyń 58,7 paıyzy balalar. </p>

Almaty qalalyq sanıtarlyq-epıdemıologııalyq baqylaý departamentiniń málimetinshe, qalada epıdemıologııalyq ahýal turaqty.

«2024 jyldyń 43 aptasyna deıin qalada JRVI-diń 12 413 jaǵdaıy tirkeldi. Bul ótken aptaǵa qaraǵanda 20,5%-ǵa tómen. Qalalyq zerthanalyq monıtorıng barysynda tumaý vırýsy anyqtalmaǵanymen, rınovırýs, paragrıpp, adenovırýs jáne maýsymdyq koronavırýs sııaqty basqa JRVI vırýstary tirkeldi», — dep atap ótti departamentten.

Bıyl jergilikti bıýdjet qarajatyna «táýekel tobyndaǵy» adamdardy vaktsınatsııalaý úshin 200 000 doza mólsherinde reseılik «Grıppol plıýs» úsh valentti tumaýǵa qarsy vaktsınasy satyp alyndy.

«1 qarashadaǵy jaǵdaı boıynsha Almaty qalasynda tumaýǵa qarsy 201 946 adam egildi, bul qalanyń jalpy halqynyń 8,8 paıyzy. Olardyń arasynda 19 692 medıtsına qyzmetkeri, 14 jasqa deıingi 20 635 bala, 6074 júkti áıel, 2145 jabyq mekemeler kontıngenti (qarttar úıleri jáne balalar úıleri), 16 748 oqýshy, jáne 132 350 sozylmaly aýrýlary bar eresekter bar», — delingen habarlamada. 

Budan bólek, aqyly negizde jeke medıtsınalyq ortalyqtarda 1946 adam, onyń ishinde jumys berýshilerdiń qarajatyna 813 adam jáne óz aqshasyn 1133 turǵyn vaktsına saldyrdy.

Osyǵan deıin Almatynyń densaýlyq saqtaý ınfraqurylymyn jańartýǵa 69,4 mlrd teńge bólinetini týraly jazǵan edik.