Almatyda 200 úlesker páteriniń kiltin ala almaı júr
Almatylyq áıeldiń aıtýynsha, reıderlik boıynsha qozǵalǵan qylmystyq is saldarynan 2017 jyldan beri 200 adam «Esentai City» turǵyn úı kesheninen baspanalaryna qol jetkize almaı júr.
«Osyǵan baılanysty bizge eshkim nazar aýdarmaıdy. Bul qylmystyq is qurylystyń odan ári jalǵasýyna esh kedergi keltirmeıdi. Ókinishtisi, osy daý-damaılar júrip jatqanda, bizdiń máselemizdi eshkim sheship jatqan joq. Bizge kómektesińizshi», – dep júgindi qala ákimine Almaty turǵyny.
Óz kezeginde Erbolat Dosaev bul jaǵdaıda kómektese almaıtynyn jetkizdi.
Onyń aıtýynsha, ákimdik qurylys salýshylarmen kelissóz júrgizýge quqymyz joq.
«Men jaǵdaıdy túsindirgim keledi. Biz tipti qala atynan qurylysty ary qaraı júrgizýge kim daıyn ekenin de aıta almaımyz. Úleskerlerden qarjyny kim jınaǵanyn bilmeımiz. Sebebi qylmystyq is qozǵaldy. Bul jer ýchaskeleriniń aktıvterin kepilge alǵan bank bar. Men bank ókilderimen jeke sóılesip, sheshim qabyldaýyn suradym. Olar aqshany qaıtarý úshin páterlerdi satýy kerek, oǵan ruqsat joq. Aldymen másele qazirgi qojaıyndarymen sheshilýi tıis. Sondaı-aq bul quqyq qorǵaý organdarynyń quzyrynda», - dedi ákim.
Almaty qalalyq polıtsııa departamentiniń bastyǵy Arystanǵanı Zapparov atalǵan is Astanada ekenin aıtty.
Eske salaıyq, Esentai City turǵyn úı kesheniniń qurylysyn Parmigiano Group kompanııasy júrgizdi.
2022 jyly osy kompanııanyń orynbasary Almas Ábdiǵapparov asa iri kólemde senip tapsyrylǵan bóten múlikti urlaǵany úshin 7 jylǵa sottalǵan bolatyn.
Sondaı-aq 2022 jyly Qarjylyq monıtorıng agenttigi Eldos Qospaev pen onyń senimdi tulǵalaryna reıderlik jasady degen aıyppen tergeý bastaǵan bolatyn.
Qospaev óziniń senimdi tulǵalary arqyly Almaty qalasynyń eń bedeldi aýdandarynyń birinde «Esentaı Sıtı» turǵyn úı kesheniniń qurylysyn júrgizetin «AV-Construction» JShS-degi úlesiniń 75% ıelendi. Qalǵan 25%-y belgili kásipker Ábdiǵapparovqa tıesili boldy, ol 2016 jyly JShS atynan turǵyn úı qurylysyna 31 ga aýmaqty satyp alǵan.