Almatyda 10 myń volt toq soqqan er adam aman qaldy

<p>ALMATY. KAZINFORM &ndash; Almatylyq kombýstıologtar joǵary voltty toq soqqan 27 jastaǵy jigittiń ómiri úshin eki aı kúresti.&nbsp;</p>

Elektr montajdaýshysy Aıan kóktemde jumys ýchaskesinde toqqa túsip qaldy. Er adam alǵashqy 10 kún Jetisý oblysy Alakól ortalyq aýdandyq aýrýhanasynyń jansaqtaý bóliminde jatty. Keıin jaǵdaıy turaqtalǵan soń naýqas tıisti deńgeıde kómek kórsete alatyn kúıik bólimi mamandary bar Almatydaǵy №4 qalalyq klınıkalyq aýrýhanaǵa jetkizildi.

Kombýstıologtar oǵan ekinshi dárejeli elektr jaraqaty, bilek, qol, ish, tabannyń IV dárejeli kúıik dıagnozyn qoıdy.

«Naýqas týystary men reanımatologpen №4 qalalyq klınıkalyq aýrýhananyń qabyldaý bólimine jetkizildi. Ony kópbeıindi dárigerler brıgadasy – travmatolog, reanımatolog-anestezıolog, terapevt – jan-jaqty tekserip, kúıik bólimine jatqyzý týraly sheshim qabyldady. Naýqastyń jaǵdaıy aýyr boldy», - deıdi bólim meńgerýshisi, dáriger-kombýstıolog Eldos Álmenov. 

Foto: Almaty densaýlyq saqtaý basqarmasy

Aýrýhanada 53 kún jatqan naýqasqa 5 márte plastıkalyq operatsııa jasaldy. 

«Meni ajaldan aman alyp qalǵan Almaty tórtinshi qalalyq aýrýhanasynyń dárigerleri men qyzmetkerlerine rahmet», - dedi Aıan Merekenov.