Almaty zoobaǵynda Pragadan jetkizilgen aq aıý ólip qaldy
Bul týraly Praga zoobaǵynyń dırektory Mıroslav Bobek óziniń Facebook paraqshasynda jazdy.
Ol aq aıý 4 mamyrda ólgenin, biraq Almaty zoobaǵy bul jóninde olarǵa 22 mamyrda ǵana habar bergenin atap ótti.
«Qazir Almaty haıýanattar baǵyndaǵy jaǵdaı bizdikine qaraǵanda jaqsy, Tomnyń kóbeıýine jaǵdaı jasalýy kerek edi. Tom bizden 28 naýryzda eshqandaı aýrý belgilerinsiz ketti. Bizdiń bilýimizshe, Almatyǵa esh qıyndyqsyz jetkizildi. Keıin Almatydan sýretter men jazbasha esepterdi aldyq. Eń sońǵysy 15 sáýirde «aıýdyń jaǵdaıy jaqsy» dep naqty aıtylǵan», - dep atap ótti ol.
Mıroslav Bobek keıinnen Almaty zoobaǵynan eshqandaı habar kelmeı qalǵandyqtan, Qazaqstanǵa qyzmetkerlerin jóneltýdi jón kórgenderin jetkizdi.
«Biraq 22 mamyrda Almaty zoobaǵy Tomnyń ólgenin aıtty. Olar bul habardy nege 18 kún boıy jasyrǵanyn túsinbeımin. Tomnyń ólimi boıynsha ashyq tergeýdi talap etemiz jáne shaǵymdy Zoobaqtar men akvarıýmdardyń eýropalyq assotsıatsııasy Chehııanyń Qazaqstandaǵy elshiligine jáne Qazaqstannyń Chehııadaǵy elshiligine jiberemiz», - dep jazdy ol.
Al, áleýmettik jelilerde Chehııanyń kóptegen turǵyny Almaty zoobaǵyna narazylyqtaryn bildirip, jan-jaqty tekserýdi talap etip jatyr.
Kazinform agenttigi Almaty zoobaǵyna mán-jaıdy tolyq túsindirip berý týraly saýal joldady.