«Almaty Jazy» aktsııasy: 15 myń tonnadan astam qoqys shyǵaryldy
26 maýsym men 6 shilde aralyǵynda kommýnaldyq kásiporyndar men merdigerlik uıymdar shahardaǵy barlyq 150 sýburqaq tazartylyp, retke keltirildi. Jabdyqtardy tekserý jáne arnaıy quraldardy qoldana otyryp tostaǵandy jýý, ınjenerlik kommýnıkatsııalyq jelilerdi ońtaılandyrý boıynsha jumys tolyq oryndaldy, kabelder aýystyryldy, sorǵylar men qozǵaltqyshtar jóndeldi, sýburqaqtardyń gıdroızolıatsııasy tekserildi.
Aktsııa barysynda QTQ tolyqtaı jınalyp, shyǵaryldy. Jumysqa 171 birlik mamandandyrylǵan tehnıka jumyldyryldy, 21 qoqys shyǵarýshy uıym qaldyq shyǵarý qyzmetin usyndy. «Almaty Jazy» aktsııasy kezinde qala aýmaǵynan barlyǵy 15 myń tonnadan astam qoqys shyǵaryldy.
1 454 konteınerlik alań sanıtarlyq óńdeýden ótip, 24 747 kóshe jáne aýlanyń qoqys jáshikteri tazartyldy, 105 konteınerdi jóndelip, syrlandy.
5 myńnan astam arnaıy tehnıka jol boıy men trotýarlardy, sondaı-aq aýla aýmaǵyn sypyrýǵa jumyldyrylǵan. Nóser kárizderi tazartyldy, 5 567 aýla ýchaskesi sypyrylyp, qoqystan tazartyldy.
Tazalyq pen tártip saqtaý maqsatynda qala kóshelerinde 798-den astam aıaldama kesheni, 122 baǵdarsham nysany men 3 181 jol belgisi jýyldy.
Kún saıyn merdiger uıymdar aryq jelilerinen 250 tekshe metr qoqys shyǵardy. «Almaty Tazalyq» MKK-men birlesip, aryqty tazartýǵa 6 merdiger uıym jumyldyryldy. 54 birlik arnaıy tehnıka men 700-den astam jumysshy kúndelikti naýqanǵa atsalysty.
Kishi Almaty, Esentaı, Úlken Almaty, Qarǵaly, Boraldaı, Jarbulaq, Tiksaı ózeni jáne Úlken Almaty kanalynyń aýmaǵynan qoqys jınaldy. Jalpy uzyndyǵy 52 km arna tazartyldy. 460 adam jáne 52 arnaıy tehnıka kúndelikti tazalyq jumystaryna jumyldyryldy.
Almaty qalasy ákimdiginiń erekshe baqylaýyndaǵy jasyl jelek tolyqtaı qalalyq kelbettiń mańyzdy bóligi bolyp tabylady. «Almaty Jazy» aktsııasy aıasynda merdiger uıymdar turǵyndardyń qaýipsizdigin qamtamasyz etý úshin apatty jaǵdaıdaǵy jáne qýraǵan 6 myń aǵashty sanıtarlyq maqsatta kesti.
Almaty qalasynyń jasyl jelegin kútip-ustaý jáne qorǵaý erejesine sáıkes, aǵashtyń pishinine, olardyń jasyna qaraı ózgeretine, kesýge tózimdilik syndy ósimdikterdiń túrlik jáne bıologııalyq ereksheligin eskere otyryp, barlyq norma saqtalyp sanıtarlyq maqsatta kesiledi. Sanıtarlyq kesýden keıin aǵashtyń kesilgen jeri arnaıy jasalǵan quraldarmen óńdeledi.
Esterińizge sala keteıik, «Almaty Jazy» aktsııasy jalpy respýblıkalyq «Taza Qazaqstan» aktsııasy aıasynda ótip jatyr jáne jaz kezinde qalalyq ınfraqurylym men qoǵamdyq múlikke uqypty qaraýdy qalyptastyrýǵa, halyq arasynda ekologııalyq mádenıetti arttyrýǵa baǵyttalǵan «Almaty – bizdiń ortaq úıimiz» naýqanynyń jalǵasy bolyp tabylady.