Almaty turǵyny sapasyz jıhaz satqan kompanııadan 1,1 mln óndirip aldy

<p>ALMATY. KAZINFORM - Almaty qalasy Áýezov aýdanynyń №2 sotynda qala turǵynynyń kompanııamen jasalǵan kelisimshartty buzý jáne 1,1 mln teńge óndirý týraly talap aryzy boıynsha azamattyq is qaraldy.</p>

Almaty sotynyń málimetine sáıkes, qala turǵyny kompanııaǵa 1,6 mln teńgege jeke joba boıynsha jıhaz jasap, ornatýǵa tapsyrys bergen. Ol 1,1 mln teńgeni (70%) aldyn ala tólep, qalǵan 30%-yn jumys aıaqtalǵannan keıin tóleýi kerek bolǵan. Al kompanııa jıhazdy 25 jumys kúni ishinde óndirýge mindettelgen.

Alaıda belgilengen merzimde mindettemeler oryndalmaǵan. Sondaı-aq tapsyrys berýshiniń keshige ornatylǵan jıhazǵa kóńili tolmady. Kompanııa kemshilikterdi joıý týraly ótinishterdi 6 aı boıy oryndamaǵan.

- «Tutynýshylardyń quqyqtaryn qorǵaý týraly» Zańnyń 13-babyna sáıkes, eger zańnamada belgilengen tártippen taýardyń (jumystyń, kórsetilgen qyzmettiń) sapasyna qoıylatyn mindetti talaptar kózdelse, tutynýshynyń osy talaptarǵa saı keletin taýardy (jumysty, kórsetilgen qyzmetti) alýǵa quqyǵy bar. Sot tapsyrys berýshiniń talaptaryn zańdy jáne negizdi dep tanyp, tapsyrys berýshi men JShS-i arasyndaǵy qyzmet kórsetý shartyn buzdy. JShS-nen tapsyrys berýshiniń paıdasyna 1,1 mln. teńge óndirildi, - dep habarlady qalalyq sottan.

Sheshim zańdy kúshine engen joq.

Eske salaıyq, buǵan deıin Almaty oblysynda Órt sóndirý qyzmeti úıi órtengen turǵynǵa 11 mln teńge tóleýge mindettelgenin jazǵanbyz.