Almaty turǵyny qala ákiminen Raıymbek boıymen ótetin BRT jobasyn qaıta qaraýdy surady
«Jaqynda Raıymbek dańǵylynda BRT paıda bolatyny týraly jańalyq shyqty. Bul sheshimdi qaıta qaraýǵa bola ma, bul dańǵyldyń oblystyq mańyzy bar. Ony Raıymbek dańǵylynda jasamańyz, munda bazarlar bar, oblystan adamdar keledi. Tımırıazev kóshesindegideı BRT salsańyz, onda jaǵdaı ýshyǵady, bitpeıtin keptelis bolady. Ol jerde avtobýs jelisi bar, nege BRT?» – dep surady turǵyn.
Erbolat Dosaev Raıymbek dańǵylyna BRT jelisi qajet dep jaýap berdi.
«Birinshiden, Raıymbek dańǵylynyń qalalyq jol ekenin túsiný qajet, tıisinshe biz BRT jobasyn iske asyratyn bolamyz, óıtkeni qalany damytý qajet. Bizdiń basymdyǵymyz – qoǵamdyq kólik, búginde ol Raıymbekte tıimsiz. Aıta ketý kerek, Raıymbek dańǵyly boıynsha BRT -nyń jalpy uzyndyǵy 17 km. Sonymen qatar joba «Altyn Orda» kólik-aýysyp otyrý torabyn (KAT) qurýdy qamtıdy»,- dedi qala basshysy.
Aıtýynsha, jobany iske asyrý kezinde qoǵamdyq kólikke bólingen jolaqtardyń uzyndyǵy dáliz uzyndyǵynan 70%-dan 90%-ǵa deıin ósedi, platformalary bar sol jaq jolaqta bólingen jolaqtar paıda bolady, al qoǵamdyq kóliktiń qozǵalys jyldamdyǵy 70%-ǵa artady.
Osylaısha, dálizdiń búkil boıynda qoǵamdyq kóliktiń basymdyǵy qamtamasyz etiledi, qarbalas saǵattaǵy ortasha qozǵalys aralyǵy shamamen 5 mınýt bolady.
«Jobany 2 kezeńde iske asyrý josparlanýda. Birinshisi – aǵymdaǵy jyly Raıymbek dańǵylynyń Ahrımenko kóshesinen Pýshkın kóshesine deıingi ortalyq ýchaskesinde bólingen jolaqtar retteledi. Qurylys-montaj jumystary 2024 jyldyń ekinshi jartyjyldyǵyna josparlanǵan. Ekinshi kezeń batys bólikti qamtıdy – Ahrımenko kóshesinen bastap «Barlyq» bazaryna deıin. 2025-2026 jyldary iske asyrylady. Sondaı-aq, osy kezeńde Raıymbek dańǵylyn Pýshkın kóshesinen «Shyǵys» kólikke aýysyp otyrý torabyna deıin uzartý josparlanǵan», - dep túsindirdi Erbolat Dosaev.