Almaty turǵyny ákimge avtobýstar apatyna baılanysty balamaly qoǵamdyq kólik qurýdy usyndy

<p>ALMATY. KAZINFORM - Almaty turǵyny qala ákimimen kezdesýde megapolıste qoǵamdyq kólikterdiń apatqa ushyraýy jıilep ketkenin aıtyp, osyǵan baılanysty jolaýshylardy tasymaldaý úshin jer ústinde mýnıtsıpaldy kabınalar qurýdy usyndy.</p>

«Meniń usynysym bar: jolaýshylardy tasymaldaýǵa arnalǵan mýnıtsıpaldy kabınalar qurý kerek. Batys tájirıbesi bul barlyq jaǵynan óte tıimdi jáne birneshe máseleni sheshetinin dáleldedi. Mysaly, keptelister, qorshaǵan orta, jol apattary. Men óz basym mundaı avtobýstardy qoldanar edim. Biraq bizde áli joq. Eksperıment retinde ony Tóle bı kóshesiniń boıynda synap kórýge bolar edi. Turǵyndar arasynda saýalnama júrgizsek bolady, jaýap beredi», - dep usynys jasady almatylyq turǵyn.

Erbolat Dosaev ákimdik qalanyń kólik máselesin sheshý úshin jumys istep jatqanyn aıtty.

«Kólik qurylymynyń bas jospary bekitildi, onda biz damytqymyz keletin ártúrli kólik túri bar. Atap aıtar bolsam, metro, LRT jáne BRT jelileri. Bul jobalardyń barlyǵy bar, biz olarmen aınalysamyz», - dep jaýap berdi ákim.

Qalalyq mobıldilik basqarmasynyń basshysy Saǵyndyq Telibaev bul usynysty qarastyratynyn tilge tıek etti.

«Bıyl Raıymbek pen Jeltoqsan boıynda BRT qurylysyn bastaımyz dep otyrmyz. Sondaı-aq kabınasy bar avtobýstar satyp alamyz, sonymen qatar №7 qalalyq aýrýhananyń aýdanynda bıyl kólik toraby – adamdar jol boıynda turmaıtyndaı úlken aıaldama qurylysy bastalady», - dedi ol.

Eske salaıyq, byltyr 22 jeltoqsan kúni keshke Almatyda Raıymbek dańǵylynda, № 7 qalalyq aýrýhana mańynda avtobýs bir top adamdy qaǵyp ketti. Saldarynan 7 adam zardap shegip, úsh adam qaza tapty.

13 aqpan kúni Almatynyń ortalyǵynda úsh avtobýs pen jeńil kólik soqtyǵysty.