Almaty turǵyndary vertıkaldy jer silkinisin sezdi – ǵalym

<p>ALMATY. KAZINFORM &ndash; Almatylyqtar tolqyn emes, tik jer dúmpýin sezdi. Ǵalym, seısmologııa ınstıtýtynyń professory Álqýat Nurmaǵambetov osyndaı pikir bildirdi.</p>

«Bul joly jer silkinisi 23 qańtardaǵy jer dúmpýimen salystyrǵanda Almatyǵa jaqyn jerde boldy. Zilzala oshaǵy qaladan ońtústikke qaraı 31 shaqyrym jerde ornalasqan, bul óte jaqyn. Bul, árıne, qalaǵa qaýip tóndiredi. Ádette mundaı silkinisterden keıin birneshe ret dúmpý qaıtalanady. Biraq, ol qaýipti emes», – deıdi ol.

Ǵalymnyń aıtýynsha, kúshti jer silkinisiniń oshaǵy Qyrǵyzstan men Qazaqstan shekarasynda, Іle men Kúngeı Alataýynyń aralyǵynda bolǵan.

«Bul aımaqta buryn kúshti jerasty dúmpýleri tirkelgen, qazir de solaı. Bul aımaq qala úshin qaýipti», - dedi Álqýat Nurmaǵambetov

Seısmologııa ınstıtýtynyń professory qala turǵyndary bul joly silkinisti qańtar aıyndaǵydan da kúshtirek sezinýiniń sebebin túsindirdi.

«Jer silkinisiniń oshaǵy qalaǵa jaqyn bolǵan saıyn dúmpý soǵurlym tik ( vertıkaldy) bolady. Jer silkinisi kezinde gúrildegen dybys shyǵady. Búgin, adamdar sondaı daýysty estidi. Sondaı-aq, jerdi alyp kúsh tepkendeı qozǵalys, birneshe sekýndqa ǵana sozylady. Jer silkinisiniń sıpaty ádette ártúrli: jergilikti jáne alys bolady. Vertıkaldy silkinis qaladan 20-30 shaqyrym qashyqtyqta tirkeledi. Al qańtar aıynda Qytaıda bolǵan zilzala alystaǵy jer silkinisi», - dedi ol.