Almaty taýlarynda qar kóshkini júrdi

<p>ALMATY. KAZINFORM &ndash; Almatydaǵy &laquo;Pioneer&raquo; taý shańǵy kýrortynyń mańynda qar kóshkini júrdi. Áleýmettik jelide qar kóshkininiń vıdeosy paıda boldy.</p>

«Býkreev shyńynan qar kóshkini júrdi. Adamdar ólýi múmkin», - delingen jazbada. 

Tótenshe jaǵdaılar mınıstrliginiń málimetinshe, 22 naýryz kúni tańerteń jylymyqtyń áserinen, sondaı-aq jaýyn shashynǵa baılanysty Qotyrbulaq ózeniniń basseıninde qar kóshkini erip, qar massasy «Pioneer» taý shańǵysy kýrortynyń qurylysyna deıin jetti. Taýly keshen jumys istemegen, abyroı bolǵanda zardap shekken adamdar joq.

«Sarapshylar túsken qar massasynyń kólemin aýa raıy qaýipsiz bolǵanda ólsheıdi jáne esepteıdi. Aıta ketý kerek, buǵan deıin 20 naýryzda «Qazseldenqorǵaý» MM qalalyq fılıaly Pioneer kýrorty ákimshiligine kóshkin qaýpi jáne qajetti sharalar qabyldaý týraly usynys bergen bolatyn. Joǵaryda atalǵan mamandardyń usynysy boıynsha adamdardyń júrýine shekteý ornatylǵan», - delingen habarlamada. 

Almatyda 165 qar kóshkini alqaby bar, onyń 18-i qaýip tóndiredi.