Almaty seısmıkalyq aımaqta ornalasqan, zilzala kez kelgen ýaqytta bolýy múmkin - maman

<p>ALMATY. KAZINFORM — Almaty — seısmıkalyq aımaqta ornalasqan shahar. Jer silkinisi kez kelgen ýaqytta bolýy múmkin. Bul týraly baspasóz máslıhaty barysynda Ulttyq seısmologııalyq baqylaýlar men zertteýler ǵylymı ortalyǵynyń dırektory Dáýlet Sársenbaev aıtty.</p>

Baspasóz máslıhatynda jýrnalıster áleýmettik jelilerde 15 qańtar kúni Almatyda joıqyn jer silkinisi bolatyny týraly aqparat taraǵanyn eske saldy. BAQ ókilderi mamandardyń mundaı boljamdardy qalaı baǵalaıtynyn surady.

Dáýlet Sársenbaevtyń aıtýynsha, seısmologııa — jas ǵylym, biraq Ulttyq seısmologııalyq baqylaýlar jáne zertteýler ǵylymı ortalyǵy 1976 jyldan beri zertteý júrgizip keledi. 

Alǵashqy seısmıkalyq baqylaý stansalary sonaý 1927-1930 jyldary ornatyldy.

Qazaqstanda seısmıkalyq belsendilikti baqylaý jáne qadaǵalaý kóptegen ondaǵan jyldar boıy júrgizilip keledi. Sondyqtan blogerlerdiń tujyrymyna emes, mamandardyń derekterine súıengen jón.

«Blogerler seısmıkalyq jaǵdaı týraly boljam jasaǵanda qandaı derekterge súıenip jatqanyn bilmeımiz. Ótken joly ne boldy, keshe túnde ne boldy, adamdar resmı uıymdarǵa senbeı kóshege shyǵa bastady. Biz seısmıkalyq aımaqta turamyz. Jer silkinisi kez kelgen ýaqytta bolýy múmkin. Osyny túsinýimiz kerek, ásirese Almatyda jáne Almaty oblysynda tarıhta birneshe ret joıqyn jer silkinisi bolǵan», — dedi seısmolog.

Maman ómirge qaýip tóndiretin — jer silkinisi emes, onyń ákeletin saldary — órt, kóshkin, sel ekenin tilge tıek etti.

«Jer silkinisi kezindegi áreket etý erejesin bilgende ǵana ómirimizdi aman alyp qala alamyz. Ózimizden bastaý kerek», — dep túıindedi Dáýlet Sársenbaev.