Almaty polıtsııasy júrgizýshilerge eskertý jasady
Kólik quraldarynyń qozǵalysyna qolaıly jaǵdaı jasaý úshin jaýyn-shashyn kezeńinde kóshelerdi ýaqtyly tazalaý qajet, bul jol qozǵalysy qaýipsizdigin qamtamasyz etýdiń mańyzdy aspektisi.
– Polıtsııanyń bul úndeýi aýa raıynyń jáne qaladaǵy jol qozǵalysy jaǵdaıynyń nasharlaýyna baılanysty jasaldy. Qala kóshelerine kóptegen kommýnaldyq kólik shyqqany belgili. Kólikterdiń durys qoıylmaýynan keı jerlerde qar shyǵarý jáne joldy tazalaý aıtarlyqtaı qıyndyq týǵyzyp jatyr. Keńseler men mekemeler kóp shoǵyrlanǵan jerlerde azamattar jol erejesin elemeı, kólikterin retsiz qoıady. Birinshiden, zańbuzýshylyq bar. Al, ekinshiden, bul qar tazalaıtyn tehnıkaǵa belgili bir qolaısyzdyqtar týǵyzady. Osyǵan baılanysty kólik ıelerine úndeý jasap, kólik turaǵy máselesine úlken jaýapkershilikpen qaraýǵa shaqyramyz,– dedi Almaty qalalyq PD Jergilikti polıtsııa qyzmeti basqarmasynyń bastyǵy Serik Shýmaev.
Spıkerdiń sózinshe, shahar kóshelerin 150-ge jýyq patrýldik polıtsııa jasaǵy men ákimshilik polıtsııanyń mamandandyrylǵan batalony kúzetedi. Jol apattarynyń aldyn alý jáne jalpy jol jaǵdaıyn turaqtandyrý úshin barlyq qajetti sharalar qabyldandy. Osyǵan baılanysty jol qozǵalysyn baqylaıtyn patrýldik polıtsııa bólimsheleriniń sany arttyryldy.
– Qysta kólik júrgizýde belgili bir qıyndyqtar týyndaıdy. Sondyqtan júrgizýshilerdi asa saq bolýǵa, jyldamdyqty shekten asyrmaýǵa, tejegish pedalin qatty baspaýǵa, eń bastysy, oryndalatyn manevr týraly basqa jol qozǵalysyna qatysýshylardy aldyn ala eskertýge shaqyramyz. Joldardaǵy qaýip-qater týraly eskertemiz jáne júrgizýshiler men jaıaý júrginshilerdi jol qozǵalysy erejelerin qatań saqtaýdy, óz ómirlerin, sondaı-aq basqa da jol qozǵalysyna qatysýshylardyń ómirine qaýip tóndirmeýdi suraımyz, – dedi ol.
Osyǵan deıin megapolıs kóshelerin tazalaýǵa myńnan astam jol jumysshysy men 475 tehnıka qar tazalaýǵa jumyldyrylǵany týraly jazǵan edik.
Sondaı-aq aýa raıyna baılanysty Almaty halyqaralyq áýejaıynda birqatar reıs keshigip ushatyny týraly aıtqan bolatynbyz.