Almaty polıtsııasy kúsheıtilgen jumys rejımine kóshti

<p>Qazaqstan Respýblıkasynyń Táýelsizdik kúnin merekeleý kezinde qoǵamdyq tártipti qamtamasyz etý, qylmystardyń, sondaı-aq basqa da zańsyz áreketterdiń der kezinde aldyn alý jáne jolyn kesý maqsatynda Almaty polıtsııasy kúsheıtilgen qyzmet túrine kóshirildi, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Qalalyq Polıtsııa departamentiniń málimetinshe, osyǵan oraı shahardyń bas polıtseıi Arystanǵanı Zapparov Almaty garnızonynyń biryńǵaı saptúzeýin júrgizdi. 

«Táýelsizdik kúni – orasan zor kúsh-jigerdiń arqasynda osy máńgilik qundylyqqa qol jetkizgen kóptegen urpaqqa kórsetilgen qurmet. Bizdiń aldymyzda qoǵamdyq tártip pen azamattardyń qaýipsizdigin qamtamasyz etý degen mańyzdy mindet tur. Bul bizdiń konstıtýtsııalyq jáne kásibı paryzymyz, al ony joǵary deńgeıdegi uıymdastyrýshylyqpen jáne sapaly etip oryndaý – departament organdary men bólimsheleriniń barlyq qyzmetkeriniń abyroıly mindeti. Árbir polıtsııa qyzmetkeri qylmyspen jáne quqyq buzýshylyqpen kúres týraly zańdylyqty qatań saqtaýǵa negizdelgenin este ustaýy kerek. Memlekettilik bizge bolashaqqa batyldyqpen qaraýǵa, bolashaǵymyzdy aıqyn kórýge múmkindik berdi», – dedi Almaty qalalyq polıtsııa departamentiniń bastyǵy Arystanǵanı Zapparov.

Saptyq tekserý barysynda aldyńǵy saptaǵy bólimshe qyzmetkerleriniń kıim-keshekteri, kólikterdiń jaǵdaıy, tehnıkalyq jabdyqtary tekserildi. 

Sonymen qatar qaladaǵy qoǵamdyq tártipti qorǵaýdy kún saıyn qolǵa alatyn patrýldik polıtsııa Polkiniń, mamandandyrylǵan batalonnyń jasaqtary, ýchaskelik ınspektorlar, JQAJ qyzmetkerleri, Ulttyq ulan sarbazdary komandırlerdiń baǵyt-baǵdary men nusqaýlary belgilendi.