Almaty oblysynyń turǵyny tiri maldy ólekselerdiń ishinde ustaǵan
Onyń vıdeosy áleýmettik jelide tarady. Beınejazbadan úlken ashyq qorada jylqy, shoshqa maldary aralas jatyr. Munda ólekselerden bólek, balshyqqa batyp, áreń qozǵalyp jatqan úı janýarlaryn kórýge bolady.
«Qyrǵaýyldy aýylynda sumdyq jaǵdaı. Jylqylar men shoshqalar ólekseniń janynda ustap otyr. Kóp jyldan beri osy másele sheshilmeı keledi. Dálirek aıtqanda, biz ol týraly búgin ǵana bildik. Biz jaǵymsyz ıis bul jer las bolǵandyqtan shyǵady dep oıladyq. Alaıda ol ólekseniń ıisi eken. Osyǵan shara qoldanýyn suraımyz», - delingen jazbada.
Atalǵan jaǵdaıǵa qatysty Almaty oblysynyń ákimdigi túsinik berdi.
«Kóshe turǵyndarynyń aryz-shaǵymdary boıynsha Qarasaı aýday ákiminiń orynbasary mal ıesimen áńgimelesti. Nátıjesinde shoshqa men jylqy satý týraly kelisimge qol jetkizildi. 4 mamyrdan bastap Oktava baspanasyna tirkelmegen 26 shoshqany ýaqytsha ornalastyrý týraly kelisim jasaldy. Baspanada veterınarlyq saraptama jáne janýarlar karantıni júrgiziledi, jylqylar tasymaldanady. Jaǵdaı aýyldyq okrýg ákiminiń, polıtsııa men veterınarlyq pýnktiń baqylaýynda. Aýdan ákimdigi tarapynan kólik máselesi sheshildi», – dep atap ótti Almaty oblysynyń ákimdiginen.
Janýarlardyń ıesi - Qyrǵaýyldy aýylynyń turǵyny Alekseı esimdi azamat.
«Bul otbasy osyndaı jaǵdaıǵa qatysty 2022 jyly aıyppul arqalaǵan. 2023 jyly 10 bas janýardy veterınarlyq stantsııaǵa tirketken. Búgingi jaǵdaı bizdiń mekemeniń baqylaýynda. Qorada mehanıkalyq jáne birneshe dızenfektsııalyq tazartýlar júrgiziledi», – dep málimdedi Qarasaı aýdandyq vetstantsııanyń ókili.
Al Raıymbek aýyldyq okrýginiń ákimdigi janýarlardyń ıesi sanıtarlyq talapqa baǵynbaı kele jatqanyna 10 jyldan asqanyn aıtty. Arasynda aıyppul tólegen. Aýyldastarynyń shaǵymdanýy birinshi ret emes.