Almaty oblysynyń turǵyny iri kólemdegi geroınmen ustaldy

<p>QONAEV. KAZINFORM &ndash; Eńbekshiqazaq aýdanynyń Esik qalasynyń 52 jastaǵy er adam esirtki saqtady degen kúdikke ilindi.</p>

– Tintý barysynda kúdiktiden «Tropıkamıd» preparaty men úı aýlasyndaǵy qora-jaıdan aq tústi untaq zat tabyldy. Saraptama nátıjesi tárkilengen zat 156 gramm «geroın» ekenin rastady. Onyń qara naryqtaǵy quny jeti mıllıon teńgeden asady, – dep habarlady polıtsııadan.

Sonymen qatar medıtsınalyq tekserý kúdiktiniń ustaý kezinde esirtki qoldanǵanyn anyqtady. 

– Qazir esirtki zattaryn zańsyz satý faktisi boıynsha qylmystyq is tirkeldi. Kúdikti ýaqytsha ustaý ızolıatoryna qamaldy. Tergeý jumystary jalǵasyp jatyr, – delingen habarlamada.

Osyǵan deıin Almatyda quny 420 mln teńgeden asatyn «sıntetıka» prekýrsorlary tárkilendi. 

Sondaı-aq Almatyda esirtkini jasyryn qoıyp ketýmen aınalysqan 105 adam ustalǵany týraly jazǵan edik.