Almaty oblysynda zilzaladan keıin jańa salynǵan mekteptiń qabyrǵalary jarylyp ketti

<p>QONAEV. KAZINFORM. &mdash; Almaty oblysy Eńbekshiqazaq aýdanynda jer silkinisinen keıin jańa mekteptiń qabyrǵalary jaryldy.&nbsp;</p>

Onyń vıdeosy áleýmettik jelide tarady. Beınejazbadan mektep qabyrǵalaryndaǵy úlken jaryqtardy kórýge bolady. 

Eńbekshiqazaq aýdandyq bilim bólimi 2015 jyly salynǵan mektep ǵımaratynyń qabyrǵasyndaǵy bul jaryq jer silkinisine deıin de bolǵanyn jetkizdi.

«Alaıda jer silkinisinen keıin jaryqshaq 10 santımetrge deıin keńeıip ketken. Bul mektepte búginde 564 oqýshy oqıdy. Oqý protsesi kúndizgi rejımde júrgiziledi. Tótenshe jaǵdaılar basqarmasy apatty jaǵdaı dep tanymady», — dep atap ótti aýdandyq bilim bóliminen.

Buǵan deıin Almaty oblysynda jer silkinisinen soń 44 nysanda jaryq paıda bolǵanyn jazǵan edik.