Almaty oblysynda «Jaıly mektep» jobasy aıasynda 55 myńǵa jýyq jańa oqýshy orny ashylady
Bul týraly Oqý-aǵartý mınıstriniń oblystyq máslıhat depýtattarymen kezdesýinde belgili boldy, dep habarlaıdy Kazinform mınıstrliktiń baspasóz qyzmetine silteme jasap.
Qazirgi ýaqytta óńirde 1760 bilim berý uıymy, onyń ishinde 429 memlekettik mektep jumys isteıdi. Úsh aýysymdy mektepter máselesin sheshý maqsatynda bıyl 15 570 oqýshyǵa arnalǵan 16 mekteptiń qurylysy bastaldy. Bıyl 1 qyrkúıekte paıdalanýǵa berilgen 9 mekteptiń 6-ýy bilim berý ınfraqurylymyn qoldaý qory esebinen salyndy. Sonymen qatar, sapar aıasynda Oqý-aǵartý mınıstrliginiń qoldaýymen taǵy 5 mektep salý týraly sheshim qabyldandy.
«Bizdiń mindetimiz — óskeleń urpaqty qaýipsiz jáne jaıly ortada jan-jaqty damytýdy qamtamasyz etý. Mınıstrlik óz tarapynan negizgi máselelerdi sheshýde jergilikti atqarýshy organdy qoldaýǵa daıyn. Bilim berý ınfraqurylymyn damytýmen qatar oqytý sapasyn arttyryp, tárbıe jumystaryn kúsheıtýge, sondaı-aq bilim berý uıymdaryn joǵary bilikti kadrlarmen qamtamasyz etýge erekshe kóńil bólinedi», - dep atap ótti Ǵanı Beısembaev.
Sonymen qatar, bıyl 102 pándik kabınet satyp alynyp, 78 mektep jańǵyrtýdan ótti. Jeke ınvestorlardyń qarajaty esebinen taǵy eki mekteptiń qurylysy júrgizilýde.
Esterińizge sala keteıik, 2023-2024 oqý jylynda 132 myń oqýshy ornyna arnalǵan 154 jańa mektep iske qosylady. Bul 12 apattyq jáne 29 úsh aýysymdy mektep máselesin sheshýge yqpal etedi.