Almaty oblysynda tutynýshy quqyǵynyń buzylýy 68 paıyzǵa ósken

<p>QONAEV. KAZINFORM - Almaty oblysynda jyl basynan beri Saýda jáne tutynýshylardyń quqyqtaryn qorǵaý departamentine 800-den astam ótinish kelip tústi. Bul ótken jylmen salystyrǵanda 67 paıyzǵa kóp.</p>

Almaty oblysy boıynsha Saýda jáne tutynýshylardyń quqyqtaryn qorǵaý departamentiniń basshysy Nursultan Jumádildiń aıtýynsha, turǵyndardyń quqyqtyq saýatynyń artýy men óz máselelerin sheshýge degen belsendiliginiń nátıjesinde 21 mıllıon 361 myń teńge kóleminde tutynýshylarǵa ótemaqy qaıtaryldy. Bul kórsetkish byltyrǵy jylmen salystyrǵanda 68 paıyzǵa joǵary.

Budan bólek, departament jospardan tys tekserýler júrgizip, 16 ákimshilik is qozǵaǵan. Nátıjesinde, ár iske 30 aılyq eseptik kórsetkish kóleminde, ıaǵnı 110 760 teńge aıyppul salyndy.

Departament basshysy oblystyq máslıhat ókilderimen, qoǵamdyq uıymdarmen birlesip, «Sapaly ónim» jobasy júzege asyrylyp jatqanyn atap ótti.

«Biz turǵyndardyń quqyqtyq saýatyn arttyrý jáne tutynýshylardyń quqyqtaryn qorǵaý mádenıetin qalyptastyrý úshin belsendi jumys istep kelemiz. Ónimder qaýipsizdik talaptaryna saı bolmaǵan jaǵdaıda óndirýshi kásipkerlerdi jaýapkershilikke tartý sharalary jalǵasa beredi», – dedi Nursultan Jumádil.

Sonymen qatar oblys boıynsha «jasyryn satyp alýshy» ádisi arqyly azyq-túlik jáne azyq-túlikke jatpaıtyn ónimderdiń 15-ten 40-qa deıin úlgisi tirkeýden ótken zerthanalarǵa jiberilgen. Keıbir ónimderdiń sapa standarttaryna sáıkes kelmeýi anyqtalyp, tıisti is-sharalar qoldanylǵan.

Eske salaıyq, buǵan deıin Atyraý oblysynda quqyǵy buzylǵan tutynýshylarǵa 14 mln teńge qaıtarylǵanyn jazǵanbyz.