Almaty oblysynda sýdıa men sot prıstavy jemqorlyq úshin sottaldy

<p>QONAEV. KAZINFORM - Almaty oblysy Іle aýdandyq soty Talǵar aýdandyq sotynyń sýdıasy A.B.Baıǵalıev pen osy sottyń prıstavy K.J. Raımbekovke qatysty úkim shyǵardy.</p>

Sýdıa sot prıstavynyń deldaldyǵymen jas balanyń jynystyq tıispeýshiligine qarsy asa aýyr qylmys jasaǵan adamǵa qatysty medıtsınalyq sıpattaǵy májbúrleý sharalarynan ótý sharttaryn ózgertkeni úshin 2 mln teńge mólsherinde para alǵany úshin kináli dep tanyldy.

«Baıǵalıev 4 jylǵa bas bostandyǵynan aıyrylyp, deldal Raımbekovke 20 mln teńge kóleminde aıyppul salyndy. Sondaı-aq, sottalǵandar memlekettik qyzmet atqarý quqyǵynan ómir boıyna aıyryldy. QR QK 41-babyna sáıkes aıyppul belgilengen merzimde tólenbegen jaǵdaıda jaza sharasy bas bostandyǵynan aıyrýǵa aýystyrylady. Sot úkimi zańdy kúshine engen joq», - dep habarlady Sybaılas jemqorlyqqa qarsy is-qımyl agenttiginiń Almaty oblysy boıynsha departamentiniń baspasóz qyzmeti.

Eske salsaq, buǵan deıin Almaty oblysynyń mamandandyrylǵan aýdanaralyq ekonomıkalyq sotynyń sýdıasy A. Abdrahmanova jemqorlyq úshin 4 jyl merzimge bas bostandyǵynan aıyrylǵan bolatyn.