Almaty oblysynda stýdent qyzdy qatygezdikpen óltirgen qylmyskerler sottaldy

<p>QONAEV. KAZINFORM &ndash; Almaty oblysynyń qylmystyq ister jónindegi mamandandyrylǵan aýdanaralyq sotynda aldyn ala sóz baılasý arqyly adamdar tobymen paıdakúnemdik nıetpen asa qatygezdikpen qasaqana kisi óltirdi degen aıyptalýshylar Q. jáne S.-qa qatysty qylmystyq is qaraldy.&nbsp;</p>

Sot málimetine sáıkes, osy jyldyń 6 naýryzynda sottalýshylar jábirlenýshimen ortaq tanysy arqyly tanysyp, jábirlenýshini ýaqytsha bir jerge ornalastyrýdy ótingen. Osy maqsatta Almaty qalasynda páter jalǵa alynǵan. 

Ekinshi kúni qarajattary bitýine baılanysty jaldaý aqysyn odan ári tóleý úshin, sottalýshy Q. jábirlenýshige «iPhone 13 Pro» markaly smartfonyn komıssııalyq dúkenge tapsyrýǵa, keıinirek ony qaıta satyp alýǵa ýáde berip, kóndirgen. Túsken qarajatty jumsaǵannan keıin sottalýshylar jábirlenýshini bankter men mıkroqarjy uıymdarynda jalpy somasy 435 myń teńgege aqshalaı qaryzdardy resimdeýge kóndirgen.

Al 12 naýryzda sottalýshylar jábirlenýshiniń smartfonyn komıssııalyq dúkennen jasyryn satyp alyp, ony 240 myń teńgege satqan, al túsken qarajatty jeke maqsatta paıdalanǵan.

Jábirlenýshiniń smartfondy qaıta satyp alý týraly birneshe talaptarynan keıin sottalýshylardyń qylmystyq nıeti paıda boldy. Osy maqsatta, 15 naýryz kúni túnde sottalýshylar jábirlenýshini úıine aparý syltaýymen onymen birge jolǵa shyǵyp, saǵat 02:00 shamasynda Qonaev-Qazaqstan avtojolynyń 36 – shaqyrymyna jetip, joldan shyǵyp, ashyq ýchaskege toqtaǵan. Sottalýshylar kezek-kezek jábirlenýshini saqamen uryp soǵyp, ony benzınmen órteýge tyrysqan, sodan keıin olar oqıǵa ornynan qashyp ketken. Jábirlenýshi alǵan jaraqattarynan sol jerde qaıtys boldy.

– Sot úkimimen Q. jáne S. ózderine taǵylǵan is-áreketterdi jasaǵany úshin kináli dep tanylyp, árqaısysyna 17 jylǵa bas bostandyǵynan aıyrý jazasy taǵaıyndaldy, - dep habarlady oblystyq sottan.

Sot úkimi zańdy kúshine endi.

Eske salaıyq, buǵan deıin BQO-da anasyn óltirgen jasóspirim 9 jylǵa sottalǵanyn jazǵan edik.