Almaty oblysynda shomylýǵa ruqsat etilgen 103 demalys orny bar

<p>QONAEV. KAZINFORM &mdash; Almaty oblysynyń Óńirilik kommýnıkatsııalar qyzmetinde aımaqtaǵy demalys oryndarynyń shomylý maýsymyna daıyndyǵy jaıly brıfıng ótti.</p>

Brıfıng barysynda oblys aýmaǵynda 103 demalys orny bar ekeni habarlandy. Olardyń 97-si Qonaev qalasynda, bireýi Eńbekshiqazaq aýdanynda jáne beseýi Іle aýdanynda ornalasqan. Almaty oblysynyń Bas memlekettik sanıtarııalyq dárigeri Marat Ismaılov demalys pen saýyqtyrý uıymdaryna baqylaý jumystary júrgizilgenin aıtty.

— Shomylý maýsymy bastalar tusta sanıtarlyq qyzmet mamandary sý qoımalarynyń sýy men jaǵajaılardaǵy qumnyń talapqa sáıkestigine zerthanalyq zertteýler júrgizedi. Bıyl mamandar 123 sý synamasy men 30 topyraq túrin saraptamadan ótkizgen. Zertteýlerdiń nátıjeleri boıynsha sý men topyraq úlgileri gıgıenalyq normatıvterdiń talaptaryna sáıkes keldi, — dedi Marat Ismaılov.

Sondaı-aq ol ruqsat etilmegen ashyq sý nysandarynda shomylý leptospıroz, vırýsty gepatıt, rotovırýstyq ınfektsııalar, gelmıntoz sııaqty aýrýlardy juqtyrýǵa ákelýi múmkin ekenin eskertti. Sondyqtan spıkerdiń aıtýynsha, sý sapasy tekserilgen, halyqtyń jappaı shomylatyn resmı oryndarynda ǵana shomylý kerek jáne sýǵa túsýge ruqsat etilgen arnaıy aqparattyq belgilerge nazar aýdarý qajet.