Almaty oblysynda olımpıadalyq úlgidegi basseıniń qurylysy nege toqtap qaldy

<p>QONAEV. KAZINFORM &ndash; Almaty oblysy, Eńbekshiqazaq aýdanyndaǵy eń iri nysandardyń biri &ndash; olımpıadalyq tıptegi júzý basseıniniń qurylysy toqtatyldy. Sot sheshimimen buzylatyn boldy.</p>

Almaty oblysy ákimdiginiń baspasóz qyzmeti málim etkendeı, oblystyq memlekettik sáýlet-qurylys baqylaý basqarmasy byltyr jeltoqsan aıynda Esik qalasyndaǵy sport keshenine (júzý basseıni) jospardan tys tekserý jumystaryn júrgizdi.

«Tekserý nátıjesinde tapsyrys berýshi «Altyn-Bóbek» balabaqshasy JShS Qazaqstandaǵy qurylys zańnamasyn buzyp, qajetti qujattar men ruqsatsyz nysan salyp jatqany anyqtaldy. Tapsyrys berýshi 690 000 teńge aıyppul arqalady. Zańsyz qurylys faktisi boıynsha da ákimshilik is qozǵalyp, sotqa joldandy. Sot tapsyrys berýshini kináli dep taýyp, taǵy 72 450 teńge aıyppul saldy»,- dep habarlady oblystyq ákimdikten.

Sonymen qatar, memlekettik sáýlet-qurylys baqylaý basqarmasy zańsyz salynyp jatqan nysandy buzý týraly ekonomıkalyq sotqa talap aryz túsirdi.

«Sot «Altyn bóbek» balabaqshasy» jaýapkershiligi shekteýli seriktestiginiń esebinen sport keshenin buzý týraly sheshim shyǵardy»,- dep túsindirdi ákimdikten.