Almaty oblysynda oqýshy qyzdar qatarlasynan aqsha bopsalaǵan

<p>ALMATY. KAZINFORM &ndash; Almaty oblysynda jasóspirim qyzdar ózderi qatarlas qyzǵa qysym kórsetip, odan aqsha bopsalaǵan. Bul týraly oblystyq polıtsııa departamentiniń bastyǵy Baýyrjan Álenov málim etti.</p>

Aıtýynsha, Qarasaı aýdanynyń polıtsııa qyzmetkerleri 15 jasar oqýshydan aqsha bopsalaýǵa qatysy bar kámeletke tolmaǵan qyzdardyń ata-analaryn anyqtap, olardy jaýapqa tartty.

«Tergeý barysynda kámeletke tolmaǵan qyzdardyń qurdasyna psıhologııalyq qysym kórsetip, odan aqsha talap etkeni anyqtaldy. Quqyq buzýshylardyń jasyn eskere otyryp, polıtsııa ata-analaryn bala tárbıesi boıynsha mindetterin oryndamaǵany úshin jaýapqa tartý boıynsha jumys júrgizdi. Bul fakt Qarasaı aýdanynyń polıtsııa basqarmasynda tirkeldi, is materıaldary sotqa jóneltildi», – deıdi Baýyrjan Álenov.

Qazir ıývenaldy polıtsııa qyzmetkerleri tergeýdiń tolyqtyǵy men obektıvtiligin qamtamasyz etýge, sondaı-aq bolashaqta mundaı jaǵdaılardyń aldyn alýǵa baǵyttalǵan profılaktıkalyq is-sharalardy qolǵa aldy.

Buǵan deıin Almaty oblysynda álimjettik jasaǵan jasóspirimder ústinen is qozǵalǵany týraly jazǵan edik.