Almaty oblysynda memleket qarjysyn jymqyrǵandardan 653 mln teńge zalal keldi

<p>ALMATY. KAZINFORM — Almaty oblysynda memlekettik sýbsıdııany zańsyz ıemdený men jalǵan qujat arqyly jasalǵan 6 qylmys tirkeldi. Zańsyz áreketterden kelgen zalal — 653 mln teńge. Bul týraly ekonomıkalyq tergeý departamenti basshysynyń orynbasary Danııar Qydyralıev aıtty. </p>

Onyń aıtýynsha, tekseris barysynda agroónerkásip kesheninde memleket qarajatyn jymqyrýdyń júıeli shemalary anyqtaldy. Máselen, et óńdeý zaýytynyń jobalaý-smetalyq qujattaryn qoldan jasaý arqyly 205 mıllıon teńge kóleminde memlekettik sýbsıdııa alǵan kompanııa basshysy 7 jylǵa bas bostandyǵynan aıyryldy.

Sonymen qatar, sol seriktestik jalǵan qujattar arqyly qurylǵynyń óndiristik qýaty týraly aqparatty burmalap, 63 mln teńge sýbsıdııa alǵan.

Budan bólek, aýylsharýashylyq kooperatıviniń basshysy mal basynyń sany týraly jalǵan aqparat usynyp, 50 mıllıon teńge sýbsıdııa alǵan jáne olardy jeke depozıttik shotqa ornalastyryp, túsken dıvıdendti óz qajettiligine jumsaǵan.

Bilim berý salasynda da uqsas jaǵdaılar anyqtaldy. Jeke balabaqshalardyń basshylary balalardy jalǵan tirkeý arqyly memlekettik bilim tapsyrysy boıynsha bólingen bıýdjet qarajatyn jymqyrǵan.

«Kommýnaldyq qyzmetter men áleýmettik mańyzy bar taýarlardy satyp alý kezinde qajetsiz deldaldardy boldyrmaý úshin belsendi jumystar júrgizilip jatyr. Bul memlekettik bıýdjettiń aqshasyn únemdeý jáne ony durys paıdalaný maqsatynda jasalyp jatqan sharalar», — dedi Danııar Qydyralıev.

Aıta ketken jón, ekonomıkalyq jáne qarjylyq quqyq buzýshylyqtar bolǵan jaǵdaıda, qarjylyq monıtorıng agenttiginiń 1458 senim telefonyna nemese «AFM Insider» telegram botyna habarlasýǵa bolady.

Eske salaıyq, buǵan deıin Almaty oblysy Іle aýdanynyń ákimi qamaýǵa alynǵanyn jazǵanbyz.