Almaty oblysynda mektep bitirýshi túlekterdiń korteji jol erejesin buzǵan

<p>QONAEV. KAZINFORM - Polıtsııa Almaty oblysynda jol erejesin óreskel buzǵan kortej qatysýshylaryn ustap, barlyq avtokólikti arnaıy turaqqa qoıdy.</p>

Áleýmettik jelilerde kortej uıymdastyrǵandardyń vıdeosy tarady. Onda túlekter jol erejesin óreskel buzyp, kólik terezesinen basyn shyǵarǵan.

Polıtsııa departamenti kópshiliktiń nazaryn aýdarǵan kortejge baılanysty túsinik berdi. Aıtýlarynsha, kináliler jaýapqa tartylady.

«Kólik quralynyń qarsy qozǵalys jolaǵyna shyǵýy, jol júrisi qaǵıdalarynda kózdelgen jolaýshylardy tasymaldaý jáne qaýipsizdik beldikterin paıdalaný jónindegi talaptardy saqtamaǵany, manevr jasaý qaǵıdalaryn buzǵany, avarııalyq jaǵdaı jasaǵany, sondaı-aq mindetti tehnıkalyq qarap-tekserýden ótpegen kólik quralyn basqarǵany úshin beınede kórsetilgen avtokólik quraldarynyń júrgizýshileri qoldanystaǵy zańnamaǵa sáıkes jaýapkershilikke tartyldy. Avtokólikter aıyppul avtoturaǵyna qoıyldy», - dep atap ótti Almaty oblysy polıtsııa departamentiniń basshysy Baýyrjan Álenov.

Óńir polıtsııasy barlyq júrgizýshilerdi QR jol erejesin qatań saqtaýǵa shaqyrady. Ony elemeý, ádette, qaıǵyly jaǵdaıǵa ákeledi.