Almaty oblysynyń turǵyny dúnıege ekinshi ret úshem ákeldi
Medıtsınalyq mekeme málimetinshe, kópbalaly ananyń úshemge aıaǵy aýyr ekenin bilgen kezden bastap Jambyl aýdandyq ortalyq aýrýhanasy dárigerleriniń erekshe baqylaýyna alyndy.
30 aptalyq merzimine jetkende joǵary mamandandyrylǵan medıtsınalyq kómek alý úshin Almaty kópsalaly klınıkalyq aýrýhanasyna aýystyryldy. 32 aptasynda sábıler kesar tiligi arqyly dúnıege keldi.
«Náresteler 2 170, 1 490, 1 900 gramm salmaqpen dúnıege keldi. Alǵashqy kúnderi sábılerdiń jaǵdaıy aýyr bolyp, ınvazıvti emes SIPAP apparatynda jatty. Tek jetinshi kúni kópbalaly ana sábılerimen qaıta qaýyshty. Dáriger akýsher-gınekologtar, neonatolog-reanımatologtar jáne medbıkelerdiń kómegimen jańa týǵan náresterdiń árqaısysy úsh aptanyń ishinde 500-den 1 kelige deıin salmaq jınady», - deıdi joǵary sanatty akýsher-gınekolog Gúljahan Jumadýlaeva.
Bir ul, eki qyzdy bolǵan baqytty ata-ana Sholpan Mamasheva men Jarqyn Baǵlaev balalarǵa Dilnáz, Gúlnáz,Temirlan esimin berdi.
«Men úshemdi ekinshi ret bosanýym. 2020 jyly tabıǵı jolmen sábılerimdi týamyn degende jaǵdaıym kúrt nasharlap, nárestelerim shala týǵan edi. Dárigerler bar kúshin salsa da, tek bir balamdy qutqaryp qaldy. Bul joly men júktilikke muqııat daıyndaldym, bilikti dárigerlerdi tańdadym jáne barlyq qajetti protsedýradan aldyn ala óttim. 30 aptada men Almaty kópsalaly klınıkalyq aýrýhanasynyń perzenthanasyna túsip, josparly kesar tiligi arqyly bosandym. Sábıler merziminen buryn dúnıege keldi, sondyqtan jaǵdaıy aýyr boldy. Biraq, men dárigerlerge sendim jáne perishtelerimmen kezdesýdi kúttim. Bosanǵannan keıingi úshinshi aptasynda men balalarymdy aman esen perzethanadan shyǵarýǵa daıyn turmyn. Endi segiz balanyń anasymyn», - deıdi Sholpan Mamasheva.
Aıta keteıik, 2023 jyly Almaty oblysynda 26 825 bala dúnıege keldi, onyń ishinde 233-i egizder jáne bir ret úshem dúnıege keldi.