Almaty oblysynda kóktemde joǵalyp ketken úsh jasar qyzdyń denesi tabyldy

<p>QONAEV. KAZINFORM — Almaty oblysynda naýryz aıynda joǵalyp ketken úsh jasar qyz óli tabyldy.</p>

Búgin tórt aı buryn joǵalyp ketken úsh jasar qyz Aııa-Sofııanyń denesi tabylǵany belgili boldy. Bul týraly volonterler Instagram paraqshasynda jazdy.  

Almaty oblystyq polıtsııa departamentiniń bastyǵy Baýyrjan Álenov 22 shilde kúni Eńbekshiqazaq aýdanynyń polıtsııasyna adam súıekteri tabylǵany týraly habar túskenin málimdedi.

«Sot-medıtsınalyq jáne genetıkalyq saraptamalar taǵaıyndalyp, jasalyp jatyr. Kúdiktiler qamaýda otyr», — dedi ol.

Eske salaıyq, 17 naýryz saǵat 16:00 shamasynda Almaty oblysy Eńbekshiqazaq aýdany Kúsh aýylynda úsh jasar qyz úıinen shyǵyp ketip, qaıtyp oralmaǵan.

Qyzdy izdeýge tikushaq pen dron jumyldyryldy.  

Keıin Almaty oblystyq polıtsııa departamenti iz-túzsiz joǵalyp ketken Aııa Sofııaǵa qatysty sotqa deıingi tergeý bastalǵanyn málim etti.