Almaty oblysynda Qyzyl kitapqa engen qaraquıryqty atyp alǵan adam ustaldy
Orman sharýashylyǵy jáne janýarlar dúnıesi komıtetinen málim etkendeı, qarashanyń 24-inen 25-ine qaraǵan túni «PO Ohotzooprom» mekemesiniń ınspektorlary Almaty oblysynyń Іle aýdanyndaǵy Aqshı aýylynyń mańynda josparly reıd barysynda jergilikti turǵyndy atpen júrip bara jatqan jerinen toqtatty. Tekserý barysynda onyń qolynda Qyzyl kitapqa engen, sırek kezdesetin jáne joıylyp ketý qaýpi tóngen qaraquıryqtyń eti tabyldy.
«Zańsyz ańshylyq jasaǵan kúdikti jáne alynǵan zattaı aıǵaqtar osy fakti boıynsha Іle aýdandyq polıtsııa bólimine jetkizildi», - delingen komıtet habarlamasynda.
Vedomstvo bizdiń elimizde sırek kezdesetin jáne qorǵalatyn janýarlardy zańsyz óndirý nemese tasymaldaý úshin jaýapkershilik qarastyrylǵanyn eske saldy.
Osyǵan deıin Sharyn ulttyq parkinde Qazaqstannyń Qyzyl kitabyna engen qaraquıryqtardyń fototuzaqqa túsip qalǵany týraly jazǵan edi.