Almaty oblysynda qazaqtyń qabyrǵaly qalamgeri Berdibek Soqpaqbaevqa eskertkish ashyldy

<p>ALMATY. KAZINFORM &ndash; Almaty oblysynyń Raıymbek aýdanynda qazaqtyń qabyrǵaly qalamgeri Berdibek Soqpaqbaevtyń 100 jyldyq mereıtoıy jalǵasyp jatyr. Bul týraly 24.kz saıty jazdy.</p>

Búgin Narynqol aýylyndaǵy ortalyq saıabaqta jazýshynyń eskertkishi ashyldy. Mereıtoılyq sharalar Saryjaz ben Qarasaz aýylynyń ortasyndaǵy jazyq dalada uıymdastyrylǵan dala qyzyqtaryna ulasty.

Qazaqqa «Meniń atym Qoja», «Balalyq shaqqa saıahat», «Ólgender qaıtyp kelmeıdi» sııaqty 20-dan astam shyǵarma syılaǵan Berdibek Soqpaqbaev qazaq ádebıetindegi qaıtalanbas tulǵa. Onyń ár áńgimesi men povesi klassıkalyq týyndyǵa aınalǵanyn qolyna qalam ustaǵan aǵaıyn men oqyrman qaýym jaqsy biledi. 100 jyldyq mereıtoıǵa oraı qalamgerdiń týǵan jeri Narynqolda eńseli eskertkish ornatyldy. Ony Senat tóraǵasy Máýlen Áshimbaev memleket basshysynyń quttyqtaý sózimen ashyp berdi.

— Berdibek Soqpaqbaevtyń 100 jyldyq mereıtoıy elimiz boıynsha joǵary deńgeıde atalyp ótýde. Osy rette bul ataýly data óńirlik, memlekettik aýqymda ǵana emes, ıÝNESKO aıasynda da keńinen toılanyp jatyr. Bul jazýshynyń álemdik deńgeıde moıyndalýynyń jarqyn kórinisi. Prezıdentimiz osy sharanyń mańyzyna basa mán berip barshańyzǵa ystyq yqylasy men jyly lebizin joldady. Ultymyzǵa rýhanı baǵdar bolatyn osyndaı uly tulǵalardyń esimin ulyqtaý enseli eldik pen salıhaly sabaqtastyqtyn jarqyn kórinisi, — dedi Máýlen Áshimbaev.

Jazýshynyń 100 jyldyǵyna oraı Narynqolda respýblıkalyq aqyndar aıtysy ótip, óner mektebiniń oqýshylary salǵan sýretter kórmesi uıymdastyryldy. Ol Soqpaqbaev kótergen san-túrli taqyryptarǵa arnaldy. Respýblıkalyq aqyndar aıtysynda Almaty oblysynyń komandasy jeńimpaz atandy.

— Búgin endi Berdibek aǵamyzdyń tuǵyry bir máńgilik eskertkish halyqtyń kókeıinde, júreginde saqtalǵan ardaqty azamattyń eskertkishi ashylyp, úlken ulttyq oılarǵa ulasatyn sharalar ótip jatyr. Munyń bári de osy sóz zergeri shynaıylyqty serik etken jazýshynyń 100 jyldyq mereıtoıy. Tek qana Qazaqstanda ǵana emes, bıyl ol Parıjde ıÝNESKO-nyń sheńberinde atalyp ótetin bolyp jatyr, — dedi QR Parlamenti Senatynyń depýtaty Nurtóre Júsip. 

Mereıtoılyq sharalardyń ekinshi kúni qazaq estrada juldyzdarynyń kontserttik baǵdarlamasy men balýandar kúresi, báıge sııaqty dala qyzyqtaryna arnaldy. Jeńimpazdar temir tulparǵa ıe bolady. Berdibek Soqpaqbaev óziniń ólmeıtin, óshpeıtin, qazaq ádebıetiniń jaýharyna aınalǵan asqaq ta bıik, shynaıy shyǵarmalary arqyly máńgi jasaı bermek.