Almaty oblysynda emdelý úshin aqsha jymqyrǵan býhgalterge sot sheshimi ózgerissiz qaldy

<p>ALMATY. KAZINFORM - Senip tapsyrylǵan bóten múlikti asa iri mólsherde talan-tarajǵa salý faktisi boıynsha sottalǵan T.-ǵa qatysty Almaty oblysy Balqash aýdandyq sotymen shyǵarylǵan úkimdi Almaty oblystyq soty prokýrordyń apellıatsııalyq ótinishhatyn boıynsha qarady.</p>

Sot málimetine sáıkes, 2020 jyldan 2024 jyldyń aqpanyna deıin T. "Balqash aýdandyq jumyspen qamtý jáne Áleýmettik baǵdarlamalar bólimi" MM-niń bas maman – esepshisi laýazymyn atqarǵan.

Ol aı saıyn óziniń jáne áriptesteriniń jeke esep shottaryna bekitilgen mólsherden artyq somada jalaqyny aýdarǵan, sondaı-aq tıisti buıryqtarsyz aqshalaı qarajatty syıaqy, materıaldyq kómek, birjolǵy áleýmettik tólemder jáne is-sapar shyǵyndary úshin ótemaqy túrinde aýdarǵan. Osydan keıin T. áriptesterine artyq aýdarylǵan aqshany qate aýdarylǵan dep sendirip, ony óziniń jeke shotyna aýdarýdy suraǵan.

Osylaısha alynǵan qarajatty ol óziniń qajettilikteri úshin, atap aıtqanda aýyr aýrýdy emdeý úshin paıdalanǵan. Óz áreketterimen T. memleketke 26,5 mln teńge kóleminde materıaldyq zalal keltirgen. Balqash aýdandyq sotynyń úkimimen T.-ǵa QK-niń 189-babynyń 4-bóligi 2-tarmaqshasy boıynsha 7 jylǵa bas bostandyǵyn shekteý túrinde jaza taǵaıyndalyp, memlekettik qyzmette qyzmet atqarýǵa ómir boıyna tyıym salynǵan.

Apellıatsııalyq saty 7 jyl bas bostandyǵynan aıyrý túrindegi negizgi jaza taǵaıyndaýdy suraǵan prokýrordyń ótinishi boıynsha qaraldy.

- Sot alqasy istiń materıaldaryn zerdelep, zertteı kele, birinshi satydaǵy sot úkim shyǵarǵan kezde sottalǵan T.-nyń shyn nıetpen ókinýi, onyń múgedektigi, onkologııalyq aýrýy, oń sıpattamalary, keltirilgen múliktik zalaldyń tolyq ótelýi, sondaı-aq jábirlenýshi taraptyń ustanymy eskerildi degen qorytyndyǵa keldi. Almaty oblystyq sotynyń qylmystyq ister jónindegi sot alqasynyń qaýlysymen daýly sot aktisi ózgerissiz, al prokýrordyń ótinishhaty qanaǵattandyrýsyz qaldyryldy, - dep habarlady oblystyq sottan.

Qaýly zańdy kúshine endi.

Eske salaıyq, buǵan deıin Almaty oblysynda stýdent qyzdy qatygezdikpen óltirgen qylmyskerler sottalǵanyn jazǵanbyz.