Almaty oblysynda bir úıir jylqyny aıdap ketken er adam 8,5 jylǵa sottaldy

<p>QONAEV. KAZINFORM &ndash; Almaty oblysynda mal ıesine 12 mıllıon teńge shyǵyn keltirgen barymtashy sottaldy.</p>

Almaty oblysy polıtsııa departamentiniń baspasóz qyzmeti málim etkendeı, mal urlyǵy byltyr bolǵan.

«2023 jyldyń qyrkúıek aıynda Jambyl aýdandyq polıtsııa basqarmasyna 30 bas jylqy joǵalǵany týraly jergilikti turǵyn aryz túsirdi. Qylmysty «izin sýytpaı» ashýǵa múmkindik bolmady, sebebi jábirlenýshi polıtsııaǵa maldaryn óz betinshe izdeýden úmitin úzgen soń bir aptadan keıin ǵana júgingen»,- dep habarlady vedomstvodan.

Jedel-izdestirý is-sharalaryn júrgizý barysynda tártip saqshylary urlanǵan jylqylar Jambyl oblysynyń Merki aýdanynda ekendigi týraly aqparat aldy.

«Kelip túsken aqparat boıynsha birqatar tekserý jumystary júrgizilip, urlanǵan jylqylardy satyp alýshy anyqtaldy. Sol adam arqyly kúdikti belgili boldy. Mán-jaılardy zerdeleı kele barymtashtyń jylqylardy birneshe kún baqylaǵanyn bildik. Keıin ol qolaıly sátti paıdalanyp, jaıylymnan bir úıir jylqyny aıdap áketip, aldyn-ala daıyndaǵan jerge jasyrǵan. Sosyn júk kóligine tıep kórshi Jambyl oblysyna jetkizgen», – dep atap ótti Jambyl aýdandyq polıtsııa basqarmasy bastyǵynyń orynbasary Beıbit Baızıhanov.

Polıtsııa ókiliniń sózinshe, Jambyl aýdandyq soty 30 bas jylqyny urlaǵan er adamǵa qatysty úkim shyǵardy.

«Jalpy keltirilgen shyǵyn 12 mıllıon teńgeden asty. Mal urlyǵyn jasaǵan azamat sotpen kináli dep tanylyp, 8,5 jylǵa bas bostandyǵynan aıyryldy»,- deıdi ol.