Almaty oblysynda jekemenshik balabaqsha basshylary 134 mln teńge jymqyrdy: úkim shyqty

<p> QONAEV. KAZINFORM — Almaty oblysy Іle aýdandyq soty jalǵan kelisim-sharttar jasaý arqyly bıýdjet qarajatyn urlaǵan segiz aıyptalýshyǵa úkim shyǵardy.</p>

Sotpen anyqtalǵandaı, 2022 jyldyń jeltoqsan aıynda sottalýshylar aldyn ala sóz baılasý arqyly balabaqshalardy tirkeý týraly jalǵan qujattar usynyp, keıin qaǵıdalardyń talaptaryna sáıkes dep tanyp, mektepke deıingi uıymdardyń tizbesine engizgen.

2023 jyldyń qańtarynda Іle aýdandyq bilim bólimi jáne jekemenshik balabaqshalar memlekettik bilim berý tapsyrysy boıynsha qyzmetter kórsetýge shart jasasqan, onyń sharttary boıynsha olardyń qyzmetin mektepke deıingi tárbıe men oqytý boıynsha qyzmetter kórsetýge aı saıynǵy tólemder arqyly memleket qarjylandyrǵan.

«Osylaısha Іle aýdandyq bilim bólimine 134 mln teńgeden astam zalal keltirgen», — dep atap ótti sottan.

Sot jaza taǵaıyndaý barysynda qylmystyq jaýaptylyq pen jazany jeńildetetin mán-jaılardy, atap aıtqanda: shyn nıetpen ókinýi, keltirilgen zalaldy erikti túrde óteýi, sondaı-aq eki sottalýshyda jas balalarynyń bolýyn eskerdi.

«Sot úkimimen barlyq segiz sottalýshy kináli dep tanyldy. Eki aıyptalýshyǵa — 5 jyl 6 aı merzim, tórt sottalýshyǵa — 5 jyl jáne eki sottalýshyǵa — 3 jyl 6 aı merzimge bas bostandyǵynan aıyrý jazasy taǵaıyndaldy. QK-niń 74-babyna sáıkes eki sottalýshy jazasy balalary 14 jasqa tolǵannan keıin óteıdi», — dep atap ótti aýdandyq sottan.

️Sot úkimi zańdy kúshine engen joq.

Buǵan deıin Almaty oblysy boıynsha sybaılas jemqorlyqqa qarsy qyzmet Іle aýdanynyń 7 jekemenshik mektepke deıingi bilim berý uıymdarynyń basshylaryna qatysty alaıaqtyq faktisi boıynsha sotqa deıingi tergeýdiń aıaqtalǵany týraly jazǵan edik.