Almaty oblysy Іle aýdany bilim bóliminiń basshysy jemqorlyq kúdigine ilindi

<p>Almaty. KAZINFORM &ndash; Almaty oblysy boıynsha Sybaılas jemqorlyqqa qarsy qyzmet &laquo;Almaty oblysy Іle aýdanynyń bilim bólimi&raquo; MM basshysyna qatysty sotqa deıingi tergeý júrgizip jatyr.</p>

«Ol Іle aýdanynyń orta mektepterinde is júzinde eńbek qyzmetin júzege asyrmaǵan adamdarǵa adamdar tobymen aldyn ala sóz baılasý boıynsha jalaqy aýdarý arqyly 680 mln teńge somasynda bıýdjet qarajatyn jymqyrý boıynsha kúdikti», - dep habarlady Sybaılas jemqorlyqqa qarsy is-qımyl agenttiginen.

Sonymen qatar ol laýazymdyq ókilettikterin asyra paıdalana otyryp, óziniń júrgizýshisin mektep-gımnazııaǵa kásibı baǵdarshy laýazymyna jalǵan jumysqa ornalastyryp, oǵan zańsyz jalpy somasy 4.9 mln teńge jalaqy tólegen.

Sottyń sanktsııasymen kúdikti qamaýǵa alyndy. Tergeý jalǵasyp jatyr.

Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy. Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.