Almaty metrosynyń jańa úsh jelisi salynady

<p>ALMATY. KAZINFORM &ndash; Almatyda metro jelisiniń jańa baǵytttary salynbaqshy. Bul týraly Almaty ákimdiginiń baspasóz qyzmeti málim etti.</p>

Ákimdiktiń málimetinshe, Almatyda shyǵys baǵytta uzyndyǵy 12,8 shaqyrym, 8 beketi bar metro jelisin salý josparlanǵan. Beketter arasyndaǵy ortasha qashyqtyq shamamen 1,7 shaqyrym. Jańa jeliniń baǵyty: Jibek joly beketinen shyǵys baǵytta Gogol kóshesi boıymen Ortalyq mádenıet jáne demalys saıabaǵy arqyly Shyǵys aınalma avtojolyna (ShAAJ) deıin, ary qaraı soltústik-shyǵys baǵytta Qulja tas joly boıymen áýejaı jaqqa shyǵatyn bolady.

Soltústik baǵytta metropollıtenniń uzyndyǵy 16,4 shaqyrym, 15 beketi bar úshinshi jelisin salý josparlanyp otyr. Onyń baǵyty kelesideı: Saıran beketinen soltústik baǵytta Brýsılovskıı kóshesi boıymen, ary qaraı Soltústik aınalma tas joly boıymen (saýda bazarlary arqyly) jáne shyǵys baǵytta M.Jumabaev kóshesimen Kókmaısa, Qarasý, Aınabulaq shaǵyn aýdandary arqyly Hmelnıtskıı kóshesine deıin.

Sondaı-aq jer ústi metro jelisin salý josparlanǵan. Ol «Almaty-2» temirjol beketinen Súıinbaı kóshesi boıymen soltústik baǵytta «Almaty-1» temirjol vokzalyna deıingi aralyqty qamtıdy. Jeliniń uzyndyǵy – 8,5 shaqyrym. Beketterdiń sany men ornalasýy jobalaý kezinde anyqtalatyn bolady.