Almaty metrosynyń qurylysyn jalǵastyrý úshin qarjy kerek - Dosaev
Almatydaǵy OKQ brıfıngi barysynda qala ákimi Erbolat Dosaev jýrnalısterdiń metro jelilerin qarjylandyrý jáne salý úshin qytaılyq kompanııalardy tartý múmkindigi týraly suraqtaryna jaýap berdi.
– Qalanyń kólik ınfraqurylymyn qurý jáne sonyń arqasynda ekologııalyq jaǵdaıdy jaqsartý biz úshin asa mańyzdy basymdyq. Negizinde metro, LRT jáne BRT sııaqty joǵary jyldamdyqty qoǵamdyq kólikti damytý kózdelgen. Úkimetpen birlesip, biz batys baǵytta - «Qalqaman» stantsııasynan «Barlyq» bazaryna deıin 5,3 km jáne shyǵys baǵytta - «Jibek joly» stantsııasynan Almaty áýejaıyna deıin 14 km jańa metro jelilerin salý úshin memlekettik kepildikpen qarajat alý múmkindigin pysyqtap jatyrmyz, - dep jaýap berdi Erbolat Dosaev.
Megapolıs ákimi qazir memlekettik kepildikter alý úshin quqyqtyq negiz daıyndalyp jatqanyn atap ótti. Máselen, jańa bıýdjet kodeksinde qaryzdy qarjylandyrý jáne ony respýblıkalyq bıýdjet qarajaty esebinen óteý kózdelgen. Bul túzetýler Parlament Senatynda.
– Biz qazir túrli halyqaralyq qarjy ınstıtýttarymen eń tıimdi sharttardy alý úshin kelissózder júrgizip jatyrmyz, múmkin bul uıymdardyń konsortsıýmy bolar. Osydan keıin konkýrstyq sharttarda merdiger tańdalady. Zamanaýı tehnologııalar tezirek qurýǵa múmkindik beredi, sondyqtan biz normatıvtik merzimderdi saqtaı alatyn seriktesterdi tańdaımyz. Biz qurylysty eki jaqta qatar bastaýdy josparlap otyrmyz. Mysaly, «Saryarqa» jáne «Baýyrjan Momyshuly» metro stantsııalarynyń qurylysy josparlanǵan 3,5 jyldan 7 jylǵa deıin 2 esege sozyldy. «Qalqaman» stantsııasy boıynsha 1,9 km metro jelisiniń qurylysy 2020 jyldan bastap 4 jyl boıy júrgizilýde. Ony 2026 jyly aıaqtaımyz, – dedi ol.
Osyǵan deıin Almatyda metro jelisi áýejaıǵa deıin uzartylatyny týraly jazǵan edik.