Almaty metrosynda qosymsha poıyz qatynaıtyn boldy

<p>Almatyda jolaýshylar aǵynyn saraptaý nátıjesinde qala metrosynda jyljymaly quramnyń sany ósti, dep habarlaıdy Kazinform.</p>

Almaty ákimdiginiń málimetinshe, qalanyń qarbalas kezinde metropolıten jelisinde endi 5 mınýt 38 sekýnd jıilikpen 11 jyljymaly quram júretin bolady.

"Oqý jylynyń bastalysymen jolaýshylar aǵyny 70 myńnan 90 myńǵa deıin ósti. Taldaý nátıjesinde jolaýshylar sany kúnine 100 myńǵa deıin kóbeıgeni eskerilip, jelige qosymsha quram shyǵarý týraly sheshim qabyldandy. Ár quram jalpy syıymdylyǵy 900 adamnan asatyn 4 vagonnan turady", - dep habarlady ákimdiktiń baspasóz qyzmeti.

Eske salsaq, Almatyda metrodaǵy poıyzdardyń júrý aralyqtary 6 mınýtqa deıin qysqarǵan edi.

Sondaı-aq Almatyda metromen júretinder sany artqan.

Sonymen birge, Almatylyqtar jyl sońyna deıin metroda 5 teńgemen qatynaı alatyny týraly jazǵanbyz.