Almaty mańyndaǵy zańsyz medrese: Oqý quny 90 myń teńge bolǵan

<p>ALMATY. KAZINFORM — Qarasaı aýdanynyń prokýratýrasy quqyq qorǵaý organdarmen birlesip 19 bala zańsyz tárbıelengen <a href="https://kaz.inform.kz/news/almati-oblisinda-19-bala-tarbielengen-zansiz-medrese-aniktaldi-22ca20/" target="_blank" rel="noopener">jasyryn dinı medreseni</a> anyqtady. Kazinform tilshisi atalǵan mekemege baryp, istiń mán-jaıyn anyqtaýǵa tyrysty.</p>

Zańsyz dinı mekeme Qaskeleń qalasyndaǵy jeke úılerdiń birinen ashylǵan. Kórshiler tájik otbasy munda 2 jyl buryn kóship kelgenin aıtady.

— Bul kisiler eki jyl buryn kóship keldi. Bizdiń kórshilerimiz, jaman adam ekenin baıqamadym. Úıinde kúıeýi men áıeli, ata-anasy jáne 5 balasy bar. Áıeli júkti, jaqynda bosanýy kerek. Úıiniń artyndaǵy kishi úıde shákirtterdi oqytatynyn bilemin. Ata-analar ózderi ákelip, ózderi tabystaıdy. Kúnine kem degende 5-10 kólik úıdiń aldynda turady. Balalardyń kóbi tájik ultynan, biraq qazaqtar da bar, — deıdi úı kórshisi.

Sondaı-aq ol bul medresede aı saıyn 20 shaqty bala oqıǵanyn jáne oqý quny 90 myń teńge bolǵanyn atap ótti.

— Balalarym aýyrsa, osy kisige Quranmen alastatamyn. Birden jazylyp ketedi. Basqa dinı aǵymnyń ókili emes dep oılaımyn. Úıimizge Quran oqýǵa shaqyrǵanda bir ózgeshelik baıqamadym. Jazǵy ýaqytta balalardy oqytatynyn biletinmin. Ár aı saıyn 15-20 bala, tipti odan da kóp bala oqıdy. Bir aıǵa oqý quny — 90 myń. Men de balalarymdy bergim kelgen. Óıtkeni bilýimizshe arab tili men Quran úıretedi. Úıdegi er kisi Qaskeleńdegi meshitterdiń birinde ımam bolýy kerek. Kúnde ımamdar kıetin jamylǵysyn kıip, meshitke kettim dep júretin, — deıdi kórshisi.

Úıdiń ózge kórshileri olardy jaqsy adamdar ekenin aıtýymen shekteldi.

Al Almaty oblysynyń ákimdigi oblys aýmaǵynda zańdy túrde tirkelgen dinı bilim beretin 1 ǵana mekeme bar ekenin habarlady. Ol — Qarasaı aýdany Úshqońyr aýylynda ornalasqan «Úshqońyr medrese-kolledji».

Jalpy ákimdik málimetinshe, Almaty oblysynyń aýmaǵynda tirkelgen 11 konfessııaǵa tıesili 423 dinı birlestiktiń fılıaldary bar.

Onyń ishinde 421 dinı ǵımarat tirkelgen: 303 meshit, 35 pravoslav shirkeýi, 10 Rım katolık shirkeýi, 63 protestant shirkeýi, 9 Iegova kýágerleri, 1 Krıshna sanasy qoǵamy.

Sondaı-aq Almaty oblysynyń din isteri basqarmasy dinı bilim beretin mekemeniń tirkelý tártibin túsindirdi.

— Medrese-kolledjdi zańdastyrý úshin bastapqyda ótinish jazý arqyly Qazaqstan musylmandary dinı basqarmasynyń Almaty oblysy boıynsha óńirlik ókildigine júginý qajet. Qajetti qujattardy dinı basqarmadan alǵannan keıin Almaty oblysynyń bilim salasynda sapany qamtamasyz etý departamentine E-lıtsenzııa arqyly ótinish jiberiledi, — dep habarlady basqarmadan.