Almaty mańyndaǵy turǵyn úı kesheniniń turǵyndary taǵy da jaryq pen jylýsyz qaldy

<p>QONAEV. KAZINFORM &mdash; Almaty mańyndaǵy &laquo;Asyl arman&raquo; turǵyn úı kesheninde jylý men jaryq óshirildi. Almaty oblysynyń ákimdigi onyń sebebin túsindirdi.</p>

Áleýmettik jelide 25 myńnan astam adam turatyn «Asyl arman» turǵyn úı kesheninde jaryq pen jylý óshirilgeni týraly aqparat paıda boldy. 

Almaty oblysynyń ákimdigi málim etkendeı, 27 jeltoqsan kúni saǵat 09:15-te Іrgeli aýyldyq okrýgi men Qaskeleń qalasynda «BeyAzhTrans» JShS-niń «AlmatyEnergoSbyt» JShS aldyndaǵy 390 752 771 teńge kólemindegi qaryzyna baılanysty elektr qýaty ajyratyldy.

- Qarasaı aýdany ákimdigi máseleni sheshý úshin shuǵyl sharalardy qolǵa alyp, AJK AQ basshylyǵymen kelissózder júrgizdi. Nátıjesinde elektr qýaty bir saǵat ishinde tolyqtaı qalpyna keltirildi. Elektr qýatynyń ajyratylýynan týyndaǵan saldardy azaıtý jáne aldaǵy ýaqytta mundaı jaǵdaılardyń qaıtalanýyna jol bermeý maqsatynda barlyq múddeli taraptyń birlesken jumysy uıymdastyryldy. Turǵyndardan qolaısyzdyqtar úshin keshirim suraımyz. Qalyptasqan jaǵdaıdy joıý úshin barlyq qajetti shara qabyldanyp jatyr, - dep habarlady ákimdikten.

Sonymen qatar, sot tártibimen «BeyAzhTrans» JShS-niń «Asyl Arman» jáne «Altyn Aýyl» turǵyn úı keshenderin elektrmen jabdyqtaý, sondaı-aq Qarasaı aýdanynyń aýyldaryn sýmen jabdyqtaý múlik keshenin jekeshelendirýdi toqtatý máselesi qaralatyn bolady.

Osyǵan deıin «Asyl arman» turǵyn úı kesheninde jylý men ystyq sý óshirilgen bolatyn.