Almaty mańyndaǵy ónerkásip aımaǵynan alapat órt shyqty

<p>QONAEV. KAZINFORM - Almaty oblysy Pervomaı ónerkásip aımaǵynda polıetılen ónimderi saqtalǵan qoıma órtendi.</p>

Almaty oblysy tótenshe jaǵdaılar departamentiniń málimetinshe, búgin tańǵy saǵat 7 shamasynda kezekshi bólimge Іle aýdanynyń Pervomaı ónerkásip aımaǵynda metall konstrýktsııalarynan jasalǵan, aýmaǵy 3600 sharshy metr bolatyn polıetılen taýarlary saqtalǵan qoımadan órt shyqqany týraly habar túsken. 

«Oqıǵa ornyna dereý Almaty oblysy TJD qyzmetkerleri jiberildi. Saǵat 7:20–da alǵashqy órt sóndirý bólimsheleri kelgen kezde nysan tolyǵymen otqa oranǵan edi. Sonymen qatar, shaqyrýdyń joǵary dárejesi boıynsha jaqyn mańdaǵy bólimshelerdiń kúsh-quraldary jiberildi. Órttiń úlken aýmaqqa taralýynyń sebebi — órt týraly kesh habarlaý. Sondaı-aq eń jaqyn ornalasqan Boraldaı kentiniń 9-órt sóndirý bóliminen araqashyqtyq — 15 km. Oblys ortalyǵynan — 87 km», — dep atap ótti departamentten.

Órt saǵat 9:12–de oqshaýlandy. Jaqyn mańdaǵy qoımaǵa ottyń taralýyna jol berilmedi.

Eń jaqyn órt gıdranty 500 metr qashyqtyqta ornalasqan.

Órtti sóndirý jumystary jalǵasyp jatyr. Zardap shekkender joq.

Órttiń sebebin anyqtaý úshin Almaty oblysy TJD anyqtaý bóliminiń jáne órt zerthanasynyń qyzmetkerleri jumys istep jatyr.

Órtti sóndirýge Almaty oblysy TJD 37 qyzmetkeri men 14 tehnıkasy jáne Almaty qalasynan 22 maman men 4 órt sóndirý mashınasy jumyldyryldy.